”الخضرا تنبت في النار”..قصيدة جديدة للشاعر أحمد على عُكه

الخضرا تنبت في النار
_______________________
لما قالوا
الخضرا تنبت في النار
كان عمرك سنتين
راقد ع الفرشة
ف مدخل البيت
والموت بيلاعبك
عسكر حرامية
وشك كان يشبه
ورقة الخس الصفرا
في ربيع العمر
رعشة ايدك
كانت بتكهرب قلب أمك وأبوك
لتكون دي
آخر رعشة
قبل ماتروح
وجارتكم كانت عمالة
بتبكي وتمتم
"والله خسارة في الموت"
بص عليك خالك ..
بصة خوف
معرفتش معناها
غير لما الدكتور
قالك:
- بعديها بستة وعشرين سنة -
ادعي له
ده خلاص بيروح
ستك جت
بعدت عنك
بإديها الموت
لفت عمرك في شالها الصوف
وخدتها جري
لحد المستشفى
كان مكتوب لك
عمر جديد
لجل تشوفها
- بعد عشرين سنة -
بتدعي لك
وهي مستنية
إيد الموت
وأنت قاعد جنبها
تبكي ..
من غير صوت
‬