عمرو مصطفى متولي يتصدر تريند جوجل بعد تصريحاته الأخيرة
حل الفنان عمر متولي ضيفًا على برنامج "الراديو بيضحك" مع فاطمة مصطفى تصدر الفنان عمر متولي محرك البحث جوجل وذلك بعد كشفه عن أسباب اعتذاره عن المشاركة في فيلم شمس الزناتي وانتشار أقاويل عن وجود خلاف بينه وبين الفنان أشرف عبد الباقي.
أسباب اعتذار عمر متولي عن فيلم شمس الزناتي
أعلن عمر متولي عن رغبته الشديدة منذ دخوله عالم الفن بإعادة إحياء شخصية سيد سبرتو والذي جسدها والده الفنان مصطفى متولي ضمن أحداث فيلم شمس الزناتي.
وأكد مصطفى أنه يريد إحياء الشخصية من خلال فيلم بالكامل يتحدث عن الشخصية وليس دور في فيلم فقط، كما نفى وجود أي خلافات تماما بين طاقم العمل.
وقال " بالتأكيد مفيش منتج ولا أي شخص هيبقى لذيذ بالنسبة ليه إنى أعمل الشخصية وبعدها اعملها في مسلسل أو فيلم لوحده، وهو ما جعلني أعتذر، وبالمناسبة الممثل اللى هيعمل الشخصية مميز جداً، ولو أنا بفكر أختار مش هلاقى أحسن منه يقدم الدور".
حقيقة الخلاف بين عمر متولي وأشرف عبد الباقي
نفى عمر متولي شائعة خلافه مع أشرف عبد الباقي والذي زعم البعض أنه اعتذر عن المشاركة في العروض القادمة لفريق مسرح مصر.
ويستعرض الموجز حديث عمر عن قوة العلاقة بينهما قوية للغاية قائلا "هو فيه أطيب من أشرف عبد الباقي، هل تتخيلي أن حد يبقى شغال معاه 5 سنين ثم يختلف معاه أوي، ده أحنا كنا بنختلف معاه كل بروفة ونقعد نهزر ونضحك بعدها بـ 5 دقايق ومش فاكرين احنا كنا بنتكلم في ايه؟، العلاقة بين الفرقة دي بالذات بيني وبين أشرف كانت عاملة زي علاقة أسرة، لأن النجاح بتاع مسرح مصر ده مايجيش جوه مجموعة بتتخانق كتير مستحيل، أنا كنت وقتها بحضر فيلم الجبابرة وبالمناسبة ده نزل دعايته على إنستجرام لسه موجود عندي، بس احنا هنضطر نعيده لأن رجاء الجداوي ولبنى محمود ومها أبو عوف التلاتة توفوا إلى رحمة الله، والفيلم ده كمان في حته لوحده، وقصته أنا وسواق أتوبيس مع 10 ستات فوق السبعين وهيتعاد من الأول".
وتابع " والفيلم كنا بنحضره وقت ما كان بيبدأ الموسم السادس بتاع مسرح مصر، ومسرح مصر كان بياخد من وقتنا 16 ساعة في اليوم لمدة 4، 5 أيام في الأسبوع، وكده انت حياتك كلها في مسرح مصر،اخرك تصور جمبه حاجة هادية أو بسيطة ده لو لحقت، واحنا عشان نصور أوشن 14 مع مسرح مصر كنا مابنامش وكان الموضوع مرهق جدًا، وكان عندي مشكلة كمان وكانت عندنا كلنا وده طبيعي، أن احنا كنا بقالنا 5 سنين كل سنة بنعمل 25 مسرحية، والفنانين العظماء اللي قبلنا في المسرح كان بيبقى معاهم رواية وتقعد معاه سنين وهو حافظها فمش واخدة من حياته هذا الضغط، إنما أحنا كنا بنعمل رواية جديدة كل 3 أيام، وتحبط أيام أن الرواية مابتضحكش وبعدها بكام يوم تشتغل على مسرحية جديدة خالص".
واختتم حديثه قائلا" ولما كنت شغال معاهم في مسرح مصر مكنتش أخش معاهم كل مسرحية، انت في الموسم هتشوفي 20 مسرحية أنا داخل في 10 منهم في مواسم 8 وفي مواسم 16، وأوس أوس مثلا كان سواق توك توك في مسرح مصر بيبقى عايز يشتغل وخلاص، بس دي كانت طاقة وليها قيمتها، والأيام دي كنت ببقى مستمتع جدًا، وأكيد مكنتش مبسوط وانا بسيب مسرح مصر، وكان لازم قرار ان اسيبهم لأني كنت داخل على فيلم من أحلام حياتي".
اقرأ أيضًا
عمر مصطفي متولى يعيد تجسيد شخصية «سيد سبرتو» في عمل فني جديد
ظهور عمر مصطفى متولى يشعل أحداث مسلسل ”الاختيار2”.. اعرف الحكاية
