بعد تصدرها للتريند.. أبرز التصريحات المثيرة للجدل لمنال عبد اللطيف وأشهر أعمالها قبل الاعتزال

تصدر اسم الفنانة المعتزلة منال عبد اللطيف، التريند، بعدما حلت أمس ضيفة على برنامج "قعدة ستات"، الذي تقدمه الإعلامية مروة صبري، وكشفت خلال اللقاء عن العديد من الأسرار المتعلقة بحياتها الشخصية، وفي السطور التالية نرصد أبرز تصريحاتها.

تصريحات منال عبد اللطيف

قالت الفنانة المعتزلة منال عبد اللطيف،أن سبب اعتزالها الفن وقرار ارتدائها الحجاب، هو أنها لا تحب الروتين اليومي للحياة، على الرغم من أنها في ذلك التوقيت كانت ستشارك في خمس مسلسلات، مُعلقة:"أنا مبحبش الروتين في حياتي، ففجأة كده لوحدي قولت مش عايزة أكمل شغل انا عايزة اتحجب، وقرار الحجاب كان بقاله أكتر من سنة بيراودني لكن أنا كنت مترددة إلا أن الحمد لله ربنا شاء وصحيت من النوم قلت أنا هتحجب، وكان في التوقيت ده أنا شغالة مسلسل كيد النسا الجزء الثاني وكنت ماضية 5 مسلسلات واخدت القرار إني هتحجب وهقعد وكلمت كل الناس اللي كنت لسه هبدأ معاهم شغل وقولت لهم أنا اتحجبت قالولي اتحجبتي إزاي انتي شغالة مع فيفي عبده وعندك مسرح بالليل قولت لهم اللي بدأته هنهيه لكن اللي مبدأش مش هعمله وكان قرار".

وأكدت منال عبد اللطيف أن كل الفنانين الذين تعاملت معهم كانوا يريدونها أن تخلع الحجاب، مُعلقة:"يعني لما اخد قرار وافكر وأقول تمام هبدأ، وكل صحابي بيقولولي اقلعي الحجاب وانتي محجبة ليه حرام، وكل الفنانين اللي اشتغلت معاهم قالولي كده في الفترة الانتقالية بتاعتي كلهم بلا استثناء، ولما اتقابلنا في حفلات خارجية بعد كده بره كانوا بيقولولي ليه حد يغطي الشعر الحلو ده".

وأكدت منال عبد اللطيف على أنها أحياناً تراودها فكرة خلع الحجاب، لاشتياقها لحياتها المنطلقة،مُضيفة:"أنا ليه بفكر أني أقلع الحجاب، ليه الفكرة بتراودني لأن أوقات بتوحشني منال المنطلقة، وأنا بطبيعتي منطلقة وأوقات بتوحشني منال وابقى عايزة انطلق في كل حاجة وأن مفيش حاجة تقيدني لكن سريعًا بقول لأ أنتي تدعي ربنا انه يثبتك لأن دي خطوة مش هينة على طول برجع لدماغي فورًا لكن بتراودني الفكرة طبعًا بتراودني".

وأوضحت أنها ترغب في خلع الحجاب في حفل زفاف ابنتها، مُتابعة:"وكل ما بتيجي الفكرة على بالي وأول يا منال اقلعي بقى الحجاب وبعدين أقول لنفسي انتي اخدتي الخطوة وقعدتي السنين دي، والفكرة اللي بتلح عليا ان ان شاء الله لما بنتي الكبيرة فرح تتجوز بفكر إني في الفرح أقلع الحجاب مش عارفة ليه بس الفكرة دي بتزن عليا ومش ضروري ألبس فستان مفتوح أهم حاجة إني أكون منطلقة لأن دايمًا الطرحة بتضايقني وأقعد طول الوقت أظبطها، وبقالي 11 سنة محجبة".

كما تحدثت عن رأيها في نظرة المجتمع لها إذا قررت خلع الحجاب، مؤكدة:"أنا بحترم رأي الناس لكن في مناطق شخصية بتاعتي مش بتاعتكم محبش حد يتدخل فيها، ورأي الناس يحترم لكن انا اللي على قناعتي هعمله وطالما مابيضرش حد يبقى محدش له دعوة بيا، وحتى السوشيال ميديا مبخافش منها، وانا مابيشغلنيش غير دائرتي الأولى جوزي ووالدي وبناتي وصديقاتي المقربات غير كده اللي برا دايرتي براحته".

معلومات عن منال عبد اللطيف

تخرجت من كلية الحقوق جامعة عين شمس، بدأت مشوارها الفني منذ أن كانت طفلة من خلال تقديمها برنامج الأطفال "البرلمان الصغير"، كان أول من اكتشفها هو المخرج محمود إبراهيم الذي قدمها للجمهور من خلال مسلسل الأطفال "بندق وبندقة"، كما قدمت العديد من المسلسلات منها:" أرابيسك، الأبطال، طوق نجاة، السيرة الهلالية، رياح الماضي، ونيس وأيامه، فستان فرح، قمر، لا أحد ينام في الإسكندرية، سوق الخضار، سوق الزلط، ملك روحي، يا ورد مين يشتريك، أوراق مصرية، بنات في الثلاثين"، ومن أشهر أفلامها :" البوليس النسائي، الأغبياء الثلاثة، استقالة ضابط شرطة، حنحب ونقب، ولا في النية أبقي، وشاركت أيضًا في مسرحية:"أخويا هايص وأنا لايص، الرجاء إنقاذ عبد المتجلي"، وكان آخر أعمالها مسلسل كيد النسا.

اقرأ أيضًا:

عثرت على ثعبان بمنزلها.. الأزمات تطارد نرمين الفقي

آخرها معجبة طلبت الزواج منه.. أبرز المواقف المحرجة لـ كاظم الساهر في حفلاته