زوجة علي الحجار تتحدث عن أسرار من حياتها الزوجية و أزمة مشروع ”100 سنة غنا”

قالت هدى زوجة الفنان علي الحجار إنها دائمة التواجد في حفلاته، مشيرة: "طبعا موجودة ومقدرش اسيبه، وانا مثل الجمهور احب استمتع بغناه، انا باجي زي الناس لأن دي المتعة بتاعتي، وبعدين عشان انا مراته بقى واقف جنبه واشوف عايز حاجة كل شوية".
وأضافت زوجة الحجار خلال لقائها مع الاعلامية سهير جودة عبر صفحتها على فيسبوك، على هامش حفلته بالامس، أنها تحب كل اغاني على الحجار، ولكن هناك أغاني مميزة تحب ان تسمعها، منها؛ (عارفة) وعاكسني بيها في البداية، و(انتي طلعتيلي منين) عشان غناها لي لكنه قدمها من قبل وشعر انها لم تاخذ حقها فقام بتجديدها وغناها لي، واغنية (بطلة حكايتي)".

وكشفت هدى عن كواليس لقائها بالفنان علي الحجار، قائلة: "كنا صحاب في البداية وهو كان صديق زوج صاحبتي، وحصل تواصل بينا في اول مرة شوفنا بعض، ومكنش حب من اول نظرة، احنا قعدنا صحاب لمدة سنة تقريبا، صحاب بس، وحصل الزواج بعد سنة من تعارفنا".

وعن مدى قلقها من الارتباط من الحجار بالرغم من تعدد تجاربه، قالت إنها لم تخشى من ذلك، فلقد عرفته وهو منفصل، واتخذ قرار بالعزوف عن الزواج، مشيرة: "قبل ما نتجوز فضلنا صحاب فترة، وعرفته على حقيقته، هو مش عشان ارتبط كتير يبقى مزواج، لا هو شخص طبيعي حظه مش حلو زيه زي أي شخص في الدنيا، وهو كشخصية مفهوش عيوب تخليني اخاف منه، وسنوات زواجنا العشرين تثبت صوابي".

قالت هدى زوجة علي الحجار، إنه زوجها شخص هادئ بطبعه ومسالم وليس لديه طلبات، مشيرة أنه جعلها تحب عمله وتحترم مواعيد عمله مثل قدر حبها له، فهذا الأمر جعل بينهما هدوء وسلام.

واضافت هدى خلال لقائها مع الاعلامية سهير جودة عبر صفحتها على فيسبوك، على هامش حفلته بالامس، أنها من مواليد برج الحمل مثل علي الحجار، مشيرة انه لا يوجد أي زوجين لا يحدث بينهما مشاكل، لكن المشاكل تذوب في ثانية بالحب، "لو في مشاكل بينا هو اللي بيبتدي بالصلح، وهو شخصية رومانسية في العادي، لكن ممكن يبقى متوحش في شغله، هو شغله كل حياته".

واكدت هدى ان على الحجار في بداية زواجهما لم يكن يتذكر المناسبات العائلية بينهما، لكن بعد ذلك أصبح يتذكر توايخ كل مناسباتهم الخاصة، "بقى يحفظ التواريخ اكتر مني واتغير كتير جدا وبقى رومانسي اوي".

وتحدثت هدى زوجة علي الحجار عن دعمها لزوجها في أزمة مشروعه "100 سنة غنا"، قائلة: "أي حد يتخيل نفسه عنده مشروع مهم وبيحضر ليه وقاعد يشتغل عليه طول العمر، وفجاة حد يروح طالع بيه وعايز ينجح بيه واللي حواليه يدعموه بيه".

واضافت هدى، خلال لقائها مع الاعلامية سهير جودة عبر صفحتها على فيسبوك، على هامش حفلته بالامس، قائلة: "يعني وجع قلبه عنده حق، وهنفضل وراه لغاية ما ياخد حقة، علي لا بيخاف من حاجة ولا بيعمل حساب لحاجة الا لربنا وشغله وضميره، مش هيضر ومش هيأذي".

وتابعت: "ليه بقول مش هيضر ومش هيأذي، عشان هو بيتأذي دلوقتي، انا مش عايزة اقول ايه اللي حصل في الحفلة دي، الناس اللي حضرت الحفلة هما اتعذبوا عشان يحجزوا تذكرة الحفلة دي، ولما بدات التذاكر يتم طرحها اتحجزت كلها في ساعتين وبعد كده الحجز اختفى، علي بيتعرض لحرب فظيعة، لكن جمهور علي الحجار مهما يحصل معاه هتلاقيه بيعمل اي حاجة عشان يوصله، ودي حاجة تطمنا".