مجدي بدر يكشف كواليس استعداده لدوره في مسلسل ”جعفر العمدة”
كشف الفنان مجدي بدر تفاصيل تحضيراته لدور بلال شامة في مسلسل جعفر العمدة، الذي يعرض خلال الموسم الرمضاني 2023.
وحل الفنان مجدي بدر ضيفًا على برنامج التاسعة بالتليفزيون المصري، وتحدث عن تفاصيل مشاركته في مسلسل جعفر العمدة بطولة الفنان محمد رمضان، حيث قال: فيه مشاهد اتصورت في إسكندرية، ومشهد السلم، أنا متعود على الضرب من محمد رمضان.
وأضاف: محمد رمضان ممثل محترف، بيضرب ومبيضربش، وبعد المشهد وبعد الضرب دا كله، مقالش ولا كلمة حضني جدا، وده أحسن تعبير من محمد رمضان وكفاية أوي، وبعد الضرب ده كله باصلي، لقيته بيحضني تاني، وأقول له المرة اللي جاية مش هخطف ابنك.
وتابع مجدي بدر: لو مكنتش عملت دور بلال شامة كنت عملت دور دلال، ودور إيمان العاصي كان مفاجأة لي، وكل واحد في المسلسل عامل شخصيته بشكل جيد، ومحمد سامي عنده الوقت إنه يعيد الشخصيات، إذ كان ليا رأي إن ممكن أقوله إن القيادات في المتحدة حاسس إن عندهم قرار إن مفيش عمل هيخش الموسم المقبل من غير ما يكون كامل.
وتحدث مجدي بدر عن تفاصيل دور بلال شامة في الحلقات المقبلة، إذ قال: في الأول بفكر في الشخصية بعيدًا عن ردود الفعل، الذي أتمنى أن تكون جيدة، ولكن أثناء التصوير الموضوع يختلف تمامًا، دوري لم ينته في المسلسل، في الحلقة الماضية المفروض أن العربية خبطتني وأنا ميت لكن في نهاية الحلقة الناس هتكتشف أن بلال شامة عايش وموجود.
وعن التعاون مع الفنان محمد رمضان، والمخرج محمد سامي، قال: محمد سامى قعد معايا وشربني الدور، وحببني فيه، وفي مساوئ الشخصية جدًا، ودي كمان مش أول مرة ألعب دور الشر، ولما بخلص التصوير بقلع الشخصية وبرجع لشخصيتي العادية.
وواصل: التعامل مع محمد رمضان مختلف عن التعامل وقت فيلم عبده موتة، والتعامل مع محمد رمضان الآن مختلف، لم يكن لي احتكاك معه هذه المرة بناء على تعليمات محمد سامي للحفاظ على مشاعري في المشاهد، وقال لي خليك عارف إنه لو قابلك هيقتلك.
واختتم مجدي بدر: إن شاء الله العمل الجاي مخطفش ابنك، وأحب إن فيه شغل حركة مع محمد رمضان، لإنه ممتع في الشغل، ومبحبش أتفرج على نفسي غير لو لوحدي، ومفيش غير مراتي سامية عاطف اللي ممكن تتفرج معايا.