حمو بيكا يكشف تطورات أزمته مع نقابة المهن الموسيقية: فيه مطرب مزور ورق مش سليم

كشف مؤدي المهرجانات الشعبية حمو بيكا، عن تطورات أزمته مع نقابة المهن الموسيقية، مشيرا إلى أنه ليس مطربا ولكنه مؤدي وله جمهوره.

وقال بيكا خلال لقائه مع الإعلامية ياسمين عز، في برنامجها كلام الناس، المذاع عبر شاشة mbc مصر: أنا مش مبسوط أني أغني برا بلدي، ومش بإيدي والناس اللي منعوني، ميعرفوش إن فيه ربنا وقانون يجيب لنا حقنا، أنا لو بإيدي اشتغل في بلدي وتراب مصر يكفيني.

وواصل: النقيب بيقول المهرجانات متنفعش تكون في مصر، طب اشمعنا باقي المطربين أخدوا كارنيهات، وفيه مطرب مشهور، مش هقول اسمه مزور ورق مش سليم، وكان متصور فيديو بالصوت والصورة على مواقع التواصل الاجتماعي، ومع ذلك أخد الكارنية.

وأضاف حمو بيكا: أنا ورقي كامل ومفيش ولا ورقة ناقصة، وأنا مش صوت ولا كروان بس ليا جمهور وشعبية كبيرة والناس بتحبني، وأنا نفسي أتصنف بس راب ولا أي حاجة، والامتحانات في النقابة ماشية بما لا يرضي الل، وجابولي ناس كبيرة من الأوبرا يختبروني، وكان لازم أغني لـ أم كلثوم وعبدالحليم حافظ، في المقابل زمايلي غنوا مهرجانات في الاختبارات.

وأوضح بيكا، أنه يشعر بـ ظلم شديد ويتمنى أن ينجح في اختبارات نقابة المهن الموسيقية، ويحصل على الكارنية ويعود للغناء على مسارح مصر مرة أخرى.

حمو بيكا: هاخد حقي بالقانون

وفي سياق متصل، تحدث حمو بيكا عبر بث مباشر على حسابه الرسمي بموقع التواصل الاجتماعي فيسبوك، عن الظلم الذي يتعرض له من نقابة المهن الموسيقية، إذ تم منعه من الغناء في مصر بالرغم من السماح للعديد من مطربي المهرجانات الشعبية الآخرين بالغناء، وأشار حمو بيكا إلى أنه سيلجأ للقانون وسيكشف كل ظالم.

وقال: أنا بدفع 15 ألف جنيه لـ نقابة المهن الموسيقية وباخد 2000 جنيه بس في الإيصال اللي بستلمه، ورفعت قضية على النقابة كلها وقضية كبيرة ولازم أوصل صوتي للناس أني مظلوم.

وواصل بيكا: المرة الجاية هقول كل أسامي الناس اللي ظلمتني ولسه بتظلمني، حرام عليكو أنا تعبت وهموت وهتجنن، وصرخت للي خالقني هو وكيلي ويكشف الظلم والفساد.

وأضاف حمو بيكا: والمصحف ما باخد جنيه، وبطلع أوردرات ببلاش من النقابة، ومش بتكلم عشان عايز آكل عيش ولو اعترضت هيقولوا متشتغلش خلاص، وأشتكي لـ مين؟ أنا معنديش حد أشتكي له غير ربنا.. ومقدرش أقول أنا دا أجري مقدرش أعمل كدا.