مخرج مسلسل ”لام شمسية” يكشف تطورات جديدة حول توقف تصوير العمل بسبب كورونا

كشف كريم الشناوي مخرج مسلسل "لام شمسية" للنجمة منى زكى عن رأيه في ردود الأفعال حول توقف العمل وخروجه من السباق الرمضاني المقبل 2022، بسبب إصابة عدد من فريق العمل بفيروس كورونا.

وكتب كريم الشناوي عبر صفحته بموقع التواصل الاجتماعي فيس بوك: "بعد خبر تأجيل المسلسل امبارح، جالي تليفونات ورسائل كتير لأصدقاء بيطمنوا وبيدعموا القرار.. أنا بس حابب أوضح إني مبسوط بالقرار وممتن لكل الشركاء في العمل اللي حطوا مصلحة المشروع قبل مصلحتهم من أول المنتج وشركة الإنتاج والأساتذة الممثلين والأساتذة رؤساء الأقسام وكل الشركاء في العمل اللي بذلوا مجهود كبير في الفترة اللي فاتت ولسه عندهم الحماس لبذل مجهود أكبر لما نستكمل العمل".

وأضاف: "أحنا عمرنا ما بنضمن النتيجة لكن دورنا نوفر أفضل ظروف ممكنة للشغل والحقيقة دي القناعة اللي عند كل فريق العمل ودي حاجة تفرح جدا حابب كمان أشكر فريق الإخراج اللي أنا حقيقي محظوظ إني بشتغل معاهم، واللي كانوا شريك أساسي في كل نجاح حققنا قبل كده، وامبارح كنت ممتن جدا إنهم حولوا قرار صعب زي ده لقرار سهل ومفهوم ومنطقي حتى لو بيلخبط حساباتهم الشخصية، ودي حاجة بتؤكد فخري واعتزازي بفريق الإخراج اللي بشتغل وسطهم".

وتابع كريم الشناوي: "حاجة أخيرة وشخصية، امبارح كانت الذكرى السنوية الأولى لوفاة عمتى مها الشناوي، وقعدت أفتكر كل الكلام اللي كانت بتحكيهولي عن الصناعة وازاي هنفضل طول الوقت قدام خيارات صعبة ولازم نقدر عليها، وفي نفس الوقت نحافظ على شغفنا للشغل اللي بنعمله.. فكنت مبسوط إنها حاضرة ومؤثرة في يوم زي امبارح".

مسلسل "لام شمسية" من بطولة منى زكي وإياد نصار وأحمد رزق، تأليف مريم نعوم وإخراج كريم الشناوي.

وكانت منى زكي شاركت في رمضان 2021 بمسلسل "لعبة نيوتن" وحقق نجاحا كبيرا، من تأليف وإخراج تامر محسن، إنتاج ميديا هاب، وبطولة منى زكي، محمد ممدوح، محمد فراج، سيد رجب، عائشة بن أحمد، مايان السيد، آدم الشرقاوي وآلاء سنان.