حديث السوشيال ميديا.. غادة عبد الرازق: سعيدة بفوز النادى الأهلى وفكرت فى اعتزال الفن وارتداء الحجاب

باتت الفنانة غادة عبد الرازق حديث السوشيال ميديا بعد حديثها عن تشكيل النادى الأهلى أمس وتحليلها للماتش وفوز الفريق الأول على الرجاء المغربى واقتناص بطولة السوبر الافريقي للمرة الثامنة، بعد حلولها ضيفة على برنامج "صدى الملاعب" الذي يقدمه الإعلامي مصطفى الآغا عبر قناة MBC1 وكشفت أيضا العديد من الأسرار والكواليس والصعوبات التي واجهتها في حياتها وهو ما سنرصده في الملخص التالي...

وقالت خلال اللقاء: أعترف لأول مرة في حياتي بأن ما حدث لي قبل التمثيل أثر على حياتي كثيراً.. ولا يوجد علاج لكل هذه الجروح، و في حاجات كتير أثرت عليا من صغري، منها وفاة والدي وأنا صغيرة، وأمي سابتني في وقت كنت محتاجة لها فيه.

واضافت: لم أهتم ببنتي روتانا لما كانت محتاجاني، وللأسف انشغلت عنها بالشهرة والنجومية والفلوس، ومش عارفة أغير ده دلوقتي، و معنديش أمل أن 2022، تبقي أفضل من 2021، بس أتمنى ربنا يخفف الضغط عني شوية، أنا خلاص بقيت مستوية ومش قادرة.

واضافت: أنا سعيدة بفوز النادي الأهلي ببطولة السوبر الإفريقي على حساب الرجاء المغربي للمرة الثامنة في تاريخه، و لو كان الأهلي إتغلب كان زماني جيت البرنامج مشلولة، ولما أوصل للأهلي بتبقى روحي مش رياضية خالص، وأنا متعصبة فوق الوصف والخيال، وأنا زي أبويا الله يرحمه، كان الأهلي يغلب نطلب أي حاجة في البيت، أما لو خسر نقعد في الأوضة محدش ميفتحش بقه.

وقال أنها كانت تضع شكيلة للنادى الأهلي وهى محمد الشناوي وعلي معلول وأيمن أشرف وبدر بانون وأكرم توفيق وأفشة وحسين الشحات وحمدي فتحي وعمرو السولية ومحمد شريف وحسام حسن، ومانويل جوزيه مدربا، وجوزيه أكتر واحد كان فاهم ودارس وواعي وحافظ اللاعيبة، وكان بالنسباله خسارة لما يكسبوا 6 أو 7.

وقالت: شعرت بالغرور عقب نجاح أعمالي الدرامية "سبق الإصرار" و"سمارة"، وارتكبت تصرفات ندمت عليها لاحقا، وأنا ذكية وليست لئيمة ومثابرة وصديقة وفية ومحبوبة، وشخصيتي تمزج ما بين القوة والضعف بنفس الوقت، ومعنديش صداقة مع حد في الوسط الفني، فيهم ناس بحبهم، فأنا أعشق منى زكي على المستوى الإنساني جدا والمستوى الفني، مع إن إحنا مش أصحاب قوي وكذلك هند صبري وزينة.

وأكدت: أنزعج من تدخل الناس في حياة الفنانين الشخصية على مواقع التواصل الاجتماعي، مؤكدة أنها تفعل ما يرضي ضميرها، وأنا مش فاهمة ليه كل الضجة دي على اعتزال الفنان أدهم نابلسي .. يا جماعة متحكموش على الناس، هو أكتر واحد حاسس باللي بينه وبين قلبه وربه، هو مش مرتاح سيبوه، وزي ما بتطالبوا إن محدش ليه دخل في دينك ولا لبسك ولا لون شعرك، إحنا كمان ملناش دخل هو عايز يسيب الفن أو مش عايز يسيبه، ده شيء يخصه، و فكرت في الاعتزال عن الفن بسبب تعبى من المهنة فأنا من 12 سنة كنت عايزة ألتزم دينيا وأتحجب وأبعد.