أحمد العوضي يكشف تطورات حالة ياسمين عبد العزيز بعد خروجها من العناية المركزة: ادعولها

كشف الفنان أحمد العوضي زوج النجمة ياسمين عبد العزيز آخر تطورات حالتها الصحية بعد خروجها من العناية المركزة، مؤكدا بأن الأطباء المعالجين لها قرروا منع زيارتها لمدة أسبوعين خوفا عليها.

وكتب العوضي عبر حسابه الشخصي على موقع التواصل الاجتماعي فيس بوك: "الحمد لله ياسمين خرجت من الرعايه المركزه، لكن تعليمات الاطباء المعالجين ممنوع الزياره تماما لمدة اسبوعين خوفا عليها حيث أن الحاله تحت الرعايه الطبيه الشديده.. حتي استقرار الحاله، اعتذر لكم عن عدم ردي لكن اعذروني غصب عني".

وتابع: "شكرا ليكم كلكم علي دعواتكم ليها ومشاعركم الطيبه وحبكم ليها، ادعولها ربنا يكملها علي خير وتقوم بالسلامه".

وكان أحمد العوضي قد وجه رسالة مؤثرة لياسمين عبد العزيز فور دخولها الرعاية المركزة، حيث قال: "يمكن ببان قدامكم دايما قوي، لكن الحقيقه أنا دلوقتي أضعف إنسان علي وجه الأرض عشان انا روحي مش معايا، انا ضعيف جدا من غيرك انتي لازم تبقي كويسه ولازم تقومي بالسلامه، انا لأول مرة اكتب من غير ما اكون مفكر انا بكتب ايه وهكتب ايه بس انتي هتقومي أن شاء الله بإذن الله عشان انتي وعداني وعد وهتتفذيه".

وأضاف العوضي: "انا عاوزك تبقي كويسه وتقومي عشان اقولك اني لو كنت ببينلك اني بحبك مره في الحقيقي واللي جوايا اني بحبك الف مره، وانا دلوقتي مش قوي زي ما انتي بتشوفيني انا دلوقتي ضعيف ضعيف جدا، لحد ما تقوميلي تاني عشان زي ما انتي بتاخدي قوتك مني انا كمان باخد قوتي منك، قومي عشان انا بحبك.. بحبك اكتر بكتيير من كل الكلام اللي انا كتبته، اكتر بكتير من كل اللي عدينا بيه مع بعض من أيام حلوه ومواقف صعبه مرت علينا ، اكتر بكتير حتي من الموقف اللي احنا فيه دلوقتي، انا بحبك، ادعولها تقوم بالسلامه زي ما انتو دايما بتدعولها بالنجاح والتوفيق هي دلوقتي محتاجه دعواتكم".

يذكر أن آخر أعمال ياسمين عبد العزيز كان مسلسل "اللي مالوش كبير" الذي عرض في الموسم الرمضاني الماضي، من إخراج مصطفى فكري.