هالة صدقى تدافع عن زملائها بسبب حضور حفل زفاف بعد وفاة سمير غانم: العزاء والفرح كلاهما واجب علي الإنسان

حرصت الفنانة هالة صدقي علي التعليق علي مشهد حضور الفنانين للفرح بعد جنازة الراحل سمير غانم، حيث قالت إن العزاء والفرح كلاهما واجب على الإنسان، وليس لأحد أحقية في محاسبة غيره عن تصرفاته.

ونشرت هالة صورة دلال عبد العزيز عبر حسابها الشخصي على موقع التواصل الاجتماعي “فيسبوك”، وعلقت قائلةً: “زي ما العزاء واجب الفرح كمان واجب، الفرح يوم في العمر وخصوصًا لو حد عزيز عليه جدا ومنتظر أشاركه اللحظة دي، المعروف جدًا إن أي فنان وأولهم الفنان سمير غانم وينزل يعرض ويضحك ويسعد جمهوره لكن قلبه من جوه كله حزن وأكبر مثال العظيم عادل إمام دفن مصطفي متولي صاحبه وجوز أخته الظهر ونزل يعرض بليل وبعد ما نزلت الستارة انهار”.

وتابعت: “ومش عادل بس لا في غيره وغيره وغيره.. للأسف الفنان بيبقي مطلوب منه فوق طاقته وأصحابه وحبايبه منتظرين منه أكتر، عمر الحزن ما كان بلون الأسود أو البكاء، ولاد سمير النهاردة مؤكد لابسين ملون علشان مامتهم ما تعرفش باللي هما فيه هل ده معناه إنهم مش زعلانين ومقهورين على باباهم، وهي قدرات ممكن حد يقدر يتغلب على أحزانه وناس لا”.

وأضافت: "وعلى فكرة أنا مكنتش معزومة علي الفرح اللي زملائي كانوا فيه، كنت معزومة في فرح تاني خالص والنهارده كمان كان عندي فرح حد من أعز أصدقائي، كلنا عارفين الأصول إن لما حد يموت نقفل التلفزيون وبلاش مزيكا وحاجات كلنا عارفينها، لكن للأسف في ظروف خارجة عن الإرادة وبدل ما نحاسب البشر واحنا عندنا رب هو المسئول عن اللي في القلوب، ندعي للزميلة والأخت العزيزه دلال إن ربنا يقومها بألف سلامة وترجع لبيتها وولادها وتتحمل فراقها لحبيب عمرها شكرًا لتفهمكم".