هانى شاكر : حمو بيكا مش عضو نقابة ويا ريت يخليه في الإسكندرية أحسن

كشف الفنان هاني شاكر نقيب المهن الموسيقية، عن العديد من كواليس حياته الفنية والخاصة، وتطرق عن مشكلته مع مطرب المهرجانات حمو بيكا وأنه تنازل عن القضية التي رفعها ضده خوفا علي مستقبله.

حيث قال في حواره مع المخرجة إيناس الدغيدي في برنامج "شيخ الحارة والجريئة 2" عن حمو بيكا: «أنا مش حاطه في دماغي، ولو حاطه في دماغي زي ما ناس كتير بتقول ما كنتش اتنازلت ليه عن القضية وأعضاء مجلس النقابة كمان اتنازلوا، بس كان لازم يبقى فيه موقف للي عمله أمام باب النقابة».

وأضاف «شاكر» أنه لا يصح ما قاله حمو بيكا، أمام مبنى النقابة، حيث إن النقابة لها احترامها ومسؤوليتها ومكانتها، كونها تُعبر عن شريحة كبيرة محترمة من المواطنين في مصر وهم الموسيقيون.

وعن سبب تنازله عن القضية، رد نقيب المهن الموسيقية، بأنه لم يكن يرغب في التسبب بأذى لـ حمو بيكا من الناحية الإنسانية: «كنت ممكن أضيع مستقبله وما اتنازلش عن القضية ويبقى رد سجون، كان هيبقى خريج سجون، شكلها مكنش هيبقى حلو، لا هقبلها له ولا لبنته اللي لسه مولودة ولا مناشدة والدته لي».

وأوضح هاني شاكر، أنه فّضل التنازل من أجل أن يكون ذلك بمثابة «قرصة ودن»، مضيفًا: «احنا مش بنتكلم مع بعض، لو شوفته هتكلم معاه عادي وأسلم عليه كمان، هو كده كده مش عضو في النقابة، هو عمل اختبار وسقط، عندنا شعبة راب وشعبة شعبي وشعبة مونولوجات، المشكلة لا هو كده ولا كده ولا كده، يخلية في الإسكندرية أحسن زي ما هو كده».