لازم أقدم تنازلات وأصاحب المنتج أو أتجوزه عرفي علشان أنجح.. مطربة شابة تثير الجدل بتصريحاتها عن الوسط الفني

كشفت المطربة دينا المصري عن استيائها من الوسط الفني، مؤكدة أنها لن تقبل أن يكون ثمن نجاحها أن تقدم أية تنازلات، حيث نشرت دينا مقطع فيديو، عبر صفحتها الشخصية بموقع التواصل الاجتماعي "فيسبوك"، قالت فيه :"يعني أنا مش عارفة هل أنا صوتي وحش، شكلي وحش، فيا عيب، فيا حاجة؟ معتقدش، كل ما أروح شركة إنتاج يقولي الله يا فنانة صوتك جميل، خلاص هنبتدي شغل يبص في حتة تانية خالص، يبص لشكلي أو لجسمي، أو يتجوزني عرفي، هو أنا لازم أعمل حاجة غلط، ولازم أقدم تنازلات، أنا طلع عيني لحد ما وصلت للي أنا فيه".

وتابعت :"أنا مقولتش إني مش بقوم من على السجادة، أنا بسهر وليا صحابي أولاد أكتر من البنات، بلبس قصير ومفتوح وكل حاجة، بس أنا مش عايزة أعمل حاجة غلط، شغل في الشارع واشتغلت، دراسة ودرست، في الأوبرا واشتغلت، عملت كل حاجة تأهل الفنان للنجاح، تعبت على نفسي، خدتها من تحت، ما عنديش مشكلة أتعب، بس عايزة أوصل وانجح، أوصل باحترامي وكياني وبصوتي ومش لازم أعمل حاجة غلط".

وأضافت :"هو احنا سمعتنا وحشة من فراغ، مش شرط الغنا بس، أي نوع من أنواع الفن عليه سبوت، لو الفن دا يا جماعة بالمنظر ده، إني لازم أصاحب المنتج، أحسن لي إني أقعد بكرامتي، لو صوتي وحش قولولي اقعدي في بيتك وما تشتغليش، أنا تعبت ومش عارفة أعمل ايه".

يذكر أن دينا المصري اسمها الحقيقي دينا حسين، من مواليد محافظة الإسكندرية عام 1992، قدمت منذ 3 أعوام فيديو كليب لأغنية حملت عنوان "جرح زي ألف".