زواج في غرفة الإنعاش.. والد زوجة أحمد السقا يتزوج داخل العناية المركزة

كشفت الإعلامية مها الصغير زوجة النجم أحمد السقا، عن قصة حب قوية لوالدها خبير التجميل محمد الصغير وعقد قرآنه مرة أخرى بعد انفصال دام 22 عاماً، وذلك أثتاء تواجده داخل العناية المركزة لإصابته بفيروس كورونا المستجد "كوفيد 19".

وقالت "مها الصغير": "في حاجه مهمه أوي عايزه كل العالم يعرفها، وأكيد مش هعرف اكتب الكلام ده تاني.. أبطال القصه دي هم أبي وحياتي كلها واللي يعرفني كويس يعرف أن محمد الصغير مش أبويا بس هو حب عمري".

وأضافت زوجة السقا: "والبطله التانيه هي أعظم ست في العالم أمي ملكة العلايلي.. قصه حب عشتها علي مدار كل يوم وكل ثانيه لغايه اللحظه حتي لما اتطلقوا كنت عارفه انه بيحبها وهي بتحبه وعمري ما شفته أو شفتها سعيدة غير وهي مراته".

وتابعت: "المهم أمي اتجوزت أبويا وهي من عائله ارستقراطيه وهو من عائله بسيطه وتحدت أهلها وقطعوها وهو لم يكن معاه سوي ١٠٠ جنيه.. وحصل مشاكل واتطلقوا من ٢٢ سنه ويوم ما تعب وهو حواليه ناس كتير أوي بس في الافراح فقط، طلب مني اطلب أمي في التليفون وطلب يشوفها وجت له علي طول، يوم ما حس انه ضعيف أوي وتعبان بجد طلب ضهره وسنده اللي بجد مش في المنظره وجت وطلب منها متزعلش منه وانها تتجوزه علي سنه الله و رسوله تاني".

واختتمت "مها" رسالتها قائلة: "وأصدقاء الابطال في هذا الفيلم الجميل اللي شهدوا هذه اللحظه هما أنا وأخويا مصطفي وأخويا التاني الدكتور اللي مسبنيش لحظه يحيي البستاني، الدنيا اتدربكت وطلب مأذون وجه المأذون جوز ملكه العلايلي لمحمد الصغير علي سنه الله ورسوله، فهذه العظيمه اتجوزته وهو محلتوش حاجه وفي عز ضعفه ورجعت له وهو في عز ضعفه برضو، ونام في حضنها وهو مرتاح أوي، هو الآن في امس الحاجه للدعاء لانه في لحظات حرجه اوي اوي اوي، ادعوا له واسفه اني طولت عليكوا".