حكيم : هسجل أدعية دينية والقرآن بصوتي لهذا السبب

أثار النجم حكيم، جدلًا واسعاً خلال تصريحاته الجريئة وتصدر من خلالها الترند، حيث أضاف أنه بعد اعتزاله الغناء سوف يسجل أدعية دينية والقرآن بصوته ويحتفظ بهم لنفسه، مضيفا، إنه يعشق الحيوانات وخاصة الخيل والكلاب.

وروى حكيم، خلال لقائه فى الجزء الثانى من حلقته فى برنامج "سهرانين" للنجم أمير كرارة المذاع على قناة ON، موقف إصابته من الحصان قائلا : «بقالي 4 أو 5 سنين مركبتش خيل، الحصان بتاعي اسمه (عيد) بس بعته، وخد جايزة أفضل رقاص في مسابقة الخيل 3 مرات، والمدرب بتاعه كان بيدربه بس بالضرب فأنا زعلت، ومحبتش ده، وسحبته من المكان، مرضتش أخليه يتهان لأن الحصان العربي ميتهانش، لأنه عزيز النفس، وأكتر حيوان ذكي وحسيس وبيحس بالإنسان وصاحبه هو الحصان، لا تقولي الكلب ولا القرد».

وتابع: «مرة الحصان وقعني لما عدينا على المكان اللي اتضرب فيه وهو بيتعلم الرقص، بقى متنرفز بشكل كبير، بقى يطير لفوق وينزل، راح راميني وجري، وأنا كان عندي فرح يومها، بقى جسمي متكلبش والوجع ظهر عليا، وكان حظي ان الفرح كله دكاترة».

وطرح حكيم مؤخرا كليبه الجديد «أخبار الطقس»، عبر قناته على موقع «يوتيوب».