شوقي غريب: خدت سندوتشات كفتة معايا مخصوص في ماتش البرازيل عشان عمار حمدي

تحدث شوقى غريب المدير الفنى للمنتخب الأولمبى عن موقف طريف لعمار حمدى لاعب المنتخب والاتحاد السكندرى خلال معسكر مباراة البرازيل، وذلك خلال مداخلة هاتفية لبرنامج وان تو مع الاعلامى سيف زاهر عبر إذاعة أون سبورت إف إم.

حيث قال:"يوم ودية البرازيل وضعت موعد الغذاء للمنتخب فى تمام الرابعة عصراً خاصة أن المباراة كانت فى التاسعة مساءاً وحينما أخبرت اللاعبين اعترض عمار حمدى قائلا :"مقدرش أقعد خمس ساعات بدون أكل".

وتابع :" قولتله خلاص ياعمار ممكن تأكل أنت الساعة 6 هجبلك سندوتشات ولما نوصل الملعب هتلاقى هناك فاكهة على الساعة 7.30 ابقى كمل أكل قالى ماشى ، وفعلا عملت سندوتشات كفتة وخدتها معايا عشان عمار يأكلها".

واختتم غريب بخصوص عمار حمدي ،قائلا :" مش بعترض فى موضوع الأكل لعمار حمدى خاصة أن جسمه ضئيل وغير قابل للزيادة ، بعترض بس على قصة الأكل بليل ، وسألت دكتور تغذية عن حالة عمار حمدى قالى لازم يعمل تحاليل وقالى بلاش تمنعه من الأكل خاصة أن الأمر ممكن يكون نفسى وممكن يتأثر فى الملعب لو منعته ، فبقيت أتعامل مع عمار زى اللاعب اللى محتاج تدريبات إضافية هو لاعب محتاج أكل زيادة وهو للأمانة طيب وصريح واللى فى قلبه على لسانه ومبحبش أزعله خاصة أن بيتحرك كويس فى الملعب وبيحرق الأكل".