رسالة مؤثرة من فتحي لجماهير الأهلي:” عقود الاحتراف تنتهي ولكن حبال الود مستمرة”

وجه أحمد فتحي لاعب النادي الأهلي، رسالة مؤثرة لجماهير النادي الأهلي، بعدما انتهى عقده مع الفريق الأحمر، وبداية عهد جديد مع فريق بيراميدز.

ويقدم نادي بيراميدز لاعبه الجديد  أحمد فتحي في مؤتمر صحفي يقام اليوم الاثنين بقاعة مؤتمرات استاد الدفاع الجوي، في ظل سياسة الفريق السماوي للتعاقد مع لاعبين أصحاب خبرات، تضع الفريق على منصات التتويج من جديد.

ونشر أحمد فتحي رسالته على صفحته الرسمية على "فيس بوك قائلا: "لحظات يصعب فيها الكلام .. لحظات يصعب فيها التعبير . خاصة وأنت بتخاطب أطراف كلها عزيزة عليك . ولها مكانة خاصة فى قلبك . وكمان عشت معاهم أحلى 12 سنة فى حياتى  .. 12 سنة كلها إنتصارات وبطولات وأفراح".
وأضاف؛" عايز أقول لو عقود الأحتراف المكتوبه بتنتهى، عقود الحب والود والأحترام بينى وبين كل منظومة النادى الأهلى لن تنتهى".
وقال:"أعذرونى لحظات قاسية وأى قسوة وانت تغادر حبايبك اللى قضيت معاهم سنين فى النادي الأهلي،  بيتى وهيفضل بيتى، حتى لو كان القدر كتب لى خطوة جديدة".
ووجه رسالته للجمهور:" وهيفضل جمهور الاهلي اللى حبنى وساعدني ووقف جنبى، هيفضل سندى .. لأنه جمهور وفى .. جمهور أصيل .. ربنا يشهد اني لم أقصر لحظه لا فى حق النادى .. ولا حق جمهوره .. وبذلت أقصي ما أملك حتى آخر لحظه، وأتمنى أكون قدمت ولو جزء من اللى يستحقه الأهلى وجمهوره،  فى هذه اللحظه الصعبه على نفسى".
وواصل توجيه رسائله ولكن لمجلس إدارة الأهلي:" عايز اسجل شكرى للنادي الأهلي وإدارته وعلي رأسها المحترم الكابتن محمود الخطيب .. وكل الشكر للجماهير اللى مهما تكلمت مش هقدر أعطيها حقها"

واختتم:" شكرا لكل المدربين اللى ساعدوني من أول يوم . وحتي أخر لحظه .. والشكر لكل زمايلي اللعيبه . اللى أنا لعبت معاهم على مدار كل الأجيال .. شكرا لاخواتي الأطباء ومساعدينهم أخصائيين التأهيل والمدلكين .. شكرا للاداريين والعمال .. شكرا لكل فرد ساعدنى ولو بأى حاجه .. أنا مش عايز حد يزعل منى .. فى الأول والآخر دى خطوات كتبها ربنا سبحانه وتعالى .. وأنا متوكل على الله فى كل خطواتي .. ودايمآ هيفضل الأهلي وجمهوره فى قلبى".