سر تاليب ايمن يونس لجماهير الاهلي ضد احمد فتحى
انتقد أيمن يونس نجم الزمالك ومنتخب مصر الاسبق قرار أحمد فتحى بالانتقال الي بيراميدز علي حساب النادى الاهلى ، وذلك خلال برنامجه الفيلسوف عبر أذاعة أون سبورت إف إم .
حيث قال " أحمد فتحى حبيبى وهو عارف كدا بس الغلط مينفعش منقولش عليه غلط ، كنت ساكت مش عايز اتكلم بس الناس بتقولى اشمعنى بتقول تصرف كارتيرون غلط والباقيين لأ ، وعشان كدا هقول رأيى لأول مرة فى قرار أحمد فتحى بالرحيل عن الاهلى والانضمام لبيراميدز "
واضاف أيمن يونس :"أحمد فتحى نجم كبير إتربى فى الاسماعيلى ولكن فى الأهلى شاف العز كله ، خير الاهلى على أحمد فتحى واضح زى الشمس ، إعلانات وبطولات وتاريخ ومنتخب مصر ، مينفعش يا أحمد تيجى تقول ياجماعة ده أخر عقد ليا وده احتراف ولازم امشى ، انت غلطان يافتحى من هنا لحد أسوان مشى "
واتم الحديث عن فتحي مختتما:"كلمة عرض بيراميدز أكبر متتقالش للأهلى يافتحى ، حتى لو المقابل المادى لبيراميدز أربع أضعاف عرض الاهلى متقولش كدا ، اللى عملته فى الاهلى يخليك تقول مش عايز حاجة تانى من الدنيا وعلى فكرة الاحتراف يافتحى هو الالتزام والانضباط والانتماء أيضاً الانتماء فى الافعال والاقوال ..من حق جمهور الاهلى يزعل منك لانه بعد ماكبرك تعمل معاهم كدا ..كل ده مالوش مخزون عندك يا أحمد ، المفروض رصيد الاهلى عندك كبير ، مش حسبة فلوس يابنى".