مي كساب تطلب من متابعيها الدعاء لزوجها

وجهت الفنانة مي كساب، رسالة لجمهورها من خلال حسابها الرسمي عبر موقع الصور الشهير "انستجرام" حيث قامت بنشر صورة جديدة وعلقت عليها قائلة: "كل اللي يعرفني من قريب يعرف كويس أني عمري ما كرهت حد ولا عمري اذيت حد ولا عمري عملت تصرف مخل بالشرف ولا اتنازلت عن شرفي ولا كرامتي في يوم من الأيام واستحملت ظلم كتير واضطهاد ومحسوبيات".
وأضافت: انا مريت بظروف صعبه كتير في حياتي بس للأسف بقالي ٤ سنين مش باشوف يومين حلوين علي بعض انا باعيش اقسي ايام حياتي من يوم ١/١٢/٢٠١٢ يوم ما اكتشفت ان امي عندها السرطان وانا مش مي انا واحده تايهه مش لاقيه نفسها موت امي كسرني ومن بعدها احداث كتير قوي وجعتني القريبين مني عارفين انا استحملت حاجات صعبه كتير اد ايه السنين اللي فاتت".
وتابعت: "بس الصراحه ده اصعب موقف اتحطيت فيه من يوم ما اتولدت مش عشان ده جوزي وحب عمري وإحساسي بعدم وجوده جمبي كان روحي متاخده من جسمي لا عشان متاكده انه مظلوم متاكده انه ضحيه طيبته وسذاجته وللاسف ضحيه تعليمه المتواضع ضحيه ثقته الزياده عن اللزوم في اي شخص يقرب منه ويضحك عليه ويقوله انا هاعملك ويوعده وعود كدابه وفي الاخر يستغله ويورطه".
وأختتمت حديثها: "طبعا لما باتكلم عن محمد كأني باتكلم عن احمد كمان اوكا واورتيجا روح واحده في جسدين ثقتي في رب العالمين كبيره جدا انه هينصرهم ويفك كربهم ثقتي في عداله القضاء العسكري كبيره انه مش هيظلمهم ثقتي في قلوبكم الرحيمه كبيره إنكم هتقفو جمبهم ادعولهم وادعموهم اقسم بالله العلي العظيم مظلومين".