بعد وصية جنازته.. مفاجأة تنتظر جثمان تامر ضيائي أمام المشرحة
تقام بعد صلاة العصر صلاة الجنازة على الفنان الراحل تامر ضيائي، الذي رحل عن عالمنا أمس، بعد تعرضه للصفع والاعتداء من أحد الأشخاص، ومن المقرر أن يتم دفن جثمانه في مقابر أسرته بالبساتين، ويتواجد حالياً أمام مشرحة زينهم عدد من الفنانين الذين ينتظرون خروج الجثمان لأداء صلاة الجنازة عليه منهم حمزة العيلي، شريف إدريس، محمد علي رزق.
وصية تامر ضيائي
كان تامر قد كتب وصيته في مايو الماضي، بعد مروره بأزمة صحية، مفصحًا عما يريد وما لا يريد أن يحدث بعد وفاته، حيث كتب منشورًا قال فيه:" بوست الوصية ده هيفضل باين على صفحتي لحد ما أموت، الحقيقة اللي كلنا عارفينها ومتأكدين منها إننا كلنا ربنا كاتبلنا إننا نموت في ميعاد محدد غير معروف، وعشان كده كتبت الكلام ده لأنى محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة، ووقتها طبعًا مش هعرف أقولها لحد".
ودون تامر ضيائي تفاصيل وصيته، والتي تمثلت في 10 نقاط، وهم:" صلاة الجنازة أهم من العزاء وهي اللي كل ما العدد زاد كل ما ثوابي ما كان أكتر، فأرجوكم تصلوا عليا، مش شرط تيجى العزاء وياريت لو اتعمل في البيت أو مكان بسيط بفلوسه تطلعولي صدقة جارية أفضل".
وشدد على ضرورة الدعاء له بدلًا من ختم القرآن، مُعلقًا:"من فضلكم لم يثبت أو يتفق عليه عمل ختمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش، وادعولي الوقت اللى هتقروا فيه جزء فضوا نفسكم واقعدوا ادعوا فيه، بلاش صدقة جارية تقليدية وسهلة ومش مستفاد بيها يعنى المصاحف كتير في مصر أوى وكل بيت فيه كتير فممكن نحط الفلوس في جامع بيتبنى أو كرسى متحرك في مستشفى يستفيدوا بيها المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة".
وأوصى تامر ضيائي بضرورة الدعاء له وقت نزوله للقبر، مُضيفًا:" دي نقطة مهمة أوى بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب، الكلام دة غلط، سيبوهم يعيطوا لحد ما يطلعوا كل الشعور اللى عندهم ومفيش حاجة بتقول إن العياط معناه عدم رضا بقضاء ربنا «وأبيضت عيناه من الحزن فهو كظيم، أهم حاجة تاني هي الدعاء وبس والصدقة، من فضلكم تكثروا الدعاء وقت نزول القبر وتتصدقوا بأى حاجة بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني أقعدوا معايا شوية ومتستعجلوش تمشوا عشان تونسوني في ليلة زى دي".
وأضاف:" الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوا على نفسكم بالدعاء ليا عشان أبقى في سعادة لحد ما أقابلكم تاني، اللي بيحبوني يدعولي كتير عشان لو مفيش حد يدعيلي، دى مهمة أوي.. عاوز الكل يسامحني على أي حاجه عملتها فيه بقصد أو بدون قصد".
وانهى تامر ضيائي وصيته بالدعاء له، مُتابعًا:" اللهم إن كثر موت الفجأة من حولي وكثر موت الشباب غفلة، يارب إن كنت أنا القادم فأحسن خاتمتي ويسّر طلوع روحي وهوّن عليّ سكراتي فإني أحب أن أرحل في هدوء وسكينة وطمأنينه، ولا تقبض روحي إلا وأنت راضٍ عني لكي أكون عبدا مقبولا عندك حتي أليق بلقائك العظيم وإن كان لي من العمر باقي فأغفر لي ذنوبي ومعاصي نفسي الأمّارة بالسوء وأعفو عني وأمحو لي كل ما يعرقل طريقي إليك وردّني إليك ردًّا جميلًا يارب العالمين".
معلومات عن تامر ضيائي
ولد تامر ضيائي يوم 3 أغسطس عام 1974، بدأ مسيرته المهنية كمبرمج للحاسب الآلي في كلية الصيدلة بجامعة القاهرة، لكن شغفه الحقيقي كان بالتمثيل، انطلق في مسيرته الفنية بالتمثيل في مسرح جامعة عين شمس وقصور الثقافة، ثم التحق بورشة استوديو الممثل ودرس التمثيل على يد المخرج خالد جلال.
ظهر تامر لأول مرة على شاشة التلفزيون في مسلسل «أنا وهؤلاء» مع الفنان محمد صبحي عام 2003، وهو الدور الذي لفت الأنظار إلى موهبته، واستمر في تقديم أدوار بارزة، منها دوره في مسلسل «الصياد» عام 2014، ودوره في مسلسل «الهروب» عام 2012، وكان آخر عمل شارك به هو مسلسل «فراولة» بطولة نيللي كريم، والذي عرض في رمضان 2024.
تم تكريمه من مهرجان الحياة لدعم الدراما العربية في دورته الخامسة عشر التي أقيمت في مدينة بورسعيد خلال عام 2014، وذلك عن دوره في مسلسل «الصياد».
أعمال تامر ضيائي
ومن أشهر أعماله:"عملة نادرة، إلا أنا، أفراح إبليس 2، النهاية، قصر النيل، أبو العروسة، زلزال، بركة، هربانه منها، رسايل، بارتي في حارتي، الخروج، نصيبى وقسمتك".
آخر كلمات تامر ضيائي
وكان تامر ضيائي، قد نشر أول أمس صورة تعبر عن تخرج ابنه أحمد من المرحلة الجامعية لنجله، وذلك من خلال حسابه الشخصي على موقع التواصل الاجتماعي" فيسبوك "، وعلق عليها قائلًا:"أنا اتخرجت"، ويعد هذا الاحتفال هو المنشور الأخير له قبل وفاته.
اقرأ أيضًا:
موعد ومكان جنازة الفنان تامر ضيائي
القبض على المتهم بالاعتداء على الفنان تامر ضيائي بالتجمع الأول