أُنفق على علاج ابني من أرباح فيديوهات التيك توك.. أبرز تصريحات عايدة غنيم
قالت الفنانة عايدة غينم، أن الخلاف الذي وقع بينها وبين الفنانة بدرية طلبة، كان بسبب طليقها، حيث أنه كاتب رواية ريا وسكينة، وتم تحويلها لعمل مسرحي دون الرجوع له، مُضيفة:طليقي كان عنده مشكلة مع الفنانة بدرية طلبة وحصل خلاف بسبب رواية ريا وسكينة هو كان كاتب الرواية وهما عملوها مسرحية من غير اسمه، والموضوع وصل للسب والقذف، ولاقيت اسمي بيتجاب في الجروب وأنا مش فيه أصلًا، واتقال إني كومبارس".
تصريحات عايدة غنيم
وأكدت عايدة غنيم، في لقائها مع الإعلامية إنجي هشام، في برنامج "المنسي"، أن الفنانة بدرية طلبة كانت صديقتها، مُتابعة:" هي كانت صاحبتي وكنت برا الموضوع علشان ميتقالش إني متحيزة، وفوجئت بـ تسجيلات صوتية بالشتيمة وأنه عايز ينجمني عليهم، وأنا لجأت للنقابة وطلبت حقي، ولكن النقابة قالت يتحل الموضوع بشكل ودي وأنها تعتذر، ولكن هما قالوا تيجي تعتذر ليا وأنا قولت لأ لأني اتشمت على جروب صحفيين علنًا والاعتذار يكون علنًا، وهي رفضت".
وأوضحت أنها تعرضت للشتائم من قبل لجان إلكترونية، لكنها أخذت حقها بالقانون، مُعلقة:" وبعدين لاقيت لجان إلكترونية بتشتمني، ولجأت للقانون وخدت حكم لصالحي، واتحكم ليا بتعويض وأنا مكنش فارق معايا الفلوس وكل اللي كنت عايزاه اعتذار قدام الدنيا كلها، والحمد لله القانون نصفني، وأنا كنت عايزة اثبت لها أن حقي هيجي بالقانون فلوس إيه اللي أنا مستنياها منها".
وأكدت عايدة غنيم، أنها تتمنى العودة للتمثيل، وأنها تعتبر لجؤها للتيك توك فترة في حياتها، مُعلقة:" نفسي أرجع أمثل يا جماعة أنا مش بتاعة تيك توك، أنا معتبرة التيك توك فترة في حياتي، ونفسي أرجع أشتغل زي ما كنت بشتغل الأول".
كما علقت الفنانة عايدة غنيم، على الفيديو التي نشرته على حسابها الشخصي بموقع تيك توك، والتي وجهت خلاله رسالة لطليقها من أجل مساعدتها في الإنفاق على نجلهم، والمساهمة في علاجه، قائلة:" أنا عملت فيديو وقولت فيه بوجه رسالة لناس عارفة نفسها، يعني مكنتش بوجه للناس بشكل عام، وقصدت أعمل الفيديو علشان أقطع كل الألسنة واللي عنده حاجة غير اللي بقوله يقولها".
وأكدت على أنها كانت الزوجة الثانية في حياة طليقها، وأنها لم تكن سبباً في انفصاله عن زوجته الأولى، مُؤكدة:" أنا كنت الجوازة رقم 2 في حياة طليقي، ولكن أنا مش سبب انفصاله عن زوجته الأولى، واتعرفت عليه 3 شهور واتجوزنا وقعدنا 4 سنين متجوزين، وأنا مخدتش إجراءات قانونية حتى من قبل ما نطلق لأني مش عايزة حد يقول لابني لما يكبر مامتك دخلت باباك المحكمة".
تصريحات عايدة غنيم عن طليقها
ولفتت عايدة غنيم إلى أنها عانت كثيراً مع طليقها، وأنه كان رافضاً طلاقها، مُتابعة:" أنا لما طلبت الطلاق قعدت سنة و3 شهور متعلقة لأنه مكنش عايز يطلقني، ومرفعتش قضية خلع مع أن ناس كتير نصحوني أرفع خلع، وأنا ربنا بيرزقني علشان خاطر ابني، وابني متأخر في الكلام وعنده حاجة اسمها حرمان بيئي، وبياخد تعديل سلوك وجلسات تنمية مهارات وتخاطب وتكامل حسي، وهو عنده فرط حركة وبرمنه جومباز وسباحة، وده مش رفاهية، وأنا مفيش حد جنبي ولا بيحضر معايا جلسات ابني".
وقالت الفنانة عايدة غنيم، أنها تعتمد على التيك توك اعتماد كلي حيث تنفق من أرباحه على نجلها، مُضيفة:" أنا حياتي كلها دلوقتي ابني وعلاجه ومبنامش، فمعنديش وقت أدخل شلة، وأنا عايشة على السوشيال ميديا والتيك توك وبفتح لايفات، والتيك توك بالنسبة ليا بقى هو اللي أنا معتمدة عليه في مصاريفي ومصاريف ابني علشان معنديش شغل، والسوشيال ميديا اللي أنا أقدر أصرف من خلالها، وهي أه مبتجبش ليا المبالغ اللي الناس متخيلاه علشان في حاجات إحنا كفنانيين منقدرش نعملها علشان نحافظ على شكلنا، ولكن المهم أنها بتساعد بجزء كبير، والناس بتنتقد على أساس إيه؟ ما أنت لو في وضعي هتعمل كده أو ممكن تعمل حاجات تانية أنا مرضاش أعملها".
كما تحدث عن نقيب المهن التمثيلية الفنان أشرف زكي، قائلة:" دكتور أشرف زكي إنسان قبل ما يبقى فنان ونقيب، وهو وقف معايا في مواقف كتير ومنها علاج ابني، وأنا ابني أهم حاجة في حياتي، وجمايله أنا شايلاها، وآخر حاجة كان في تحليل لـ ابني سعره 50 ألف جنيه، وكلمت أشرف زكي وعمل المستحيل وعملت التحليل بالتأمين الصحي".
وردت عايدة غنيم على حقيقة اعتزالها الفن، مُتابعة": أنا معتزلتش الفن، ولكن الصدمة نفسها بتاعة الموقف لما حصل كنت وقتها شغالة مسرح، وفقدت النطق 40 يوم وقعدت في المستشفى الأحبال الصوتية مبتكلمش، وطبيعي إني بعدت لأني نفسيًا مكنتش مؤهلة، وأنا لغاية فترة قريبة مكنتش بتكلم عن قتل والدتي ولا بحب حد يجبلي سيرته".
وأضافت:" أنا فعلًا الفترة الأخيرة دي مشتغلتش كتير في مصر، ولكني اشتغلت برا مصر، وأنا بيصعب عليا جدًا أني مش لاقية نفسي وأني اشتغل في تلفزيون بلدي وأشتغل برا، وأنا اتكلمت كتير مع النقابة أني عايزة أشتغل، لأن المخرجين الجداد ميعرفوش حاجة عن الناس القديمة، وهما ميعرفوش عايدة غنيم، وبيستسهلوا وبيجيبوا اللي موجودين دلوقتي".
اقرأ أيضًا: