ميسرة حديث السوشيال ميديا بسبب حديثها عن مشهد الصاروخ فى ”السفارة فى العمارة”

بات أسم الفنانة ميسرة حديث رواد مواقع التواصل الاجتماعى خلال الساعات الماضية بعد حديثها عن عدم ممانعتها الزواج من رجل متزوج، وكواليس مشاهدها مع الزعيم عادل إمام فى فيلم "السفارة فى العمارة".

وأوضحت ميسرة في برنامج "كلام الناس" من تقديم ياسمين عز، أنها لا تمانع أن تكون زوجة ثانية، أو أن يتزوج زوجها بأخرى.

وأضافت: " أتجوز رجل متجوز لو في حاجة ناقصاه من مراته، شأنا أم أبينا الرجالة عندهم التعددية، والرجل أول ما يبقى معاه فلوس لازم يتجوز، هو ربنا خلقه كده".

وتابعت ميسرة: "الرجل بيبقى قادر في حاجات كتيرة لحد سن متقدمة عن الست، فلو الست مقصرة معاه في حاجات معينة، هو محتاج واحدة تانية ومش عايز يغضب ربنا فيتجوز، بس لو الست عاملة له كل حاجة وهو طفس لها حق أنها ترفض أو تقبل".

وأكدت أن لديها صديقات يقبلن بخيانة الزوج بدلا من زواجه بأخرى موضحة: "أعرف ستات كتير تقول جوزي يصاحب ومايتجوزش عليا، ما هو لو صاحب أنتي بتشيليه ذنب، إيه لازمتها؟ أنا لو متجوزة وحاسة إني مقصرة مع جوزي في حاجات مش قادرة أديهاله وهو بيدور عليها وهيتجوز عشانها، يتجوز، ما أنا لازم أبقى عادلة مع نفسي ومع غيري".

وأشارت ميسرة إلى أن ذلك يرجع لتصالح الإنسان مع نفسه، وحرص المرأة على استقرار منزلها، ومدى حبها لزوجها، مؤكدة أنها لن تقبل التعدد لو كانت لا تقصر في واجباتها تجاهه.

وقالت عن تعاملها مع الزوجة الثانية: " هبقى كويسة معاها، لأن أنا مقصرة، أقدر أتحمل ده، بالعكس هتبقى صاحبتي عادي، لكن لو أنا مش مقصرة لا هي صاحبتي ولا هو صاحبي، خلاص الدنيا انتهت كده"

وكشفت كواليس مشهدها الشهير مع الفنان عادل إمام في فيلم "السفارة في العمارة".

وأوضحت أن مشهد "الصاروخ" تم تصويره بشكل مختلف عما ظهر به في الفيلم.

وقالت إن المخرج عمرو عرفة صورها بمفردها وهي تقول "صاروخ"، ثم صور عادل إمام بمفرده وهو يرد عليها "ماتبالغيش أوي كده".

وتابعت ميسرة: "السرير كان فاضي والكاميرا هي اللي موجودة بتاخد وشي وأنا بقول صاروخ، بعدين صوروا أستاذ عادل لوحده وركبوا المشهد في المونتاج".

وأكدت: "تلات أرباع السينما كده، مفيهاش المشاهد اللي هم فاكرينها، وأستاذ عمرو عرفة مكنش يقدر يصورنا من الجنب، فكل واحد كان لوحده".

يذكر أن فيلم "السفارة في العمارة" تم عرضه عام 2005 وهو من تأليف يوسف معاطي، إخراج عمرو عرفة وبطولة عادل إمام، داليا البحيري، أحمد راتب، لطفي لبيب، خالد زكي، خالد سرحان، سعيد طرابيك وأحمد صيام، إلى جانب عدد من ضيوف الشرف.