غادة عبد الرازق: أهلى كانوا بينادونى بالكومبارس وبدأت حياتى كمغنية وهذه سر بعدى عن السوشيال ميديا

كشفت الفنانة غادة عبد الرازق كواليس عن حياتها الشخصية والفنية، كما تحدثت عن بداية مشوارها الفني، وأسباب اختفائها عن مواقع التواصل الاجتماعي، من خلال حلولها ضيفة على الإعلامية إيمان بسيوني، في برنامج نجوم مع إيمان.

وقالت عبد الرازق: لما كبرت بقيت بدور على الأمان أكثر، وعمري ما عملت عيد ميلاد لنفسي، وآخر مرة احتفلت بعيد ميلادي كانت من 20 سنة، ومبحضرش عيد ميلاد ابنتي روتانا، واختياراتي في الأعمال دائمًا بتكون ضد مجهول.

وأشارت: لحد دلوقتي في الشرق الأوسط كله، عندنا الولد غير البنت، كنت أتمنى روتانا بنتي يكون ليها ولد أخ، ومسلسل الكابوس من أحلي المسلسلات اللي اشتغلت فيها، لو الفن بالجمال، إحنا في أحلى مننا مليون مرة، لو الشغل في الفن بالحلاوة كان زمانا قاعدين في البيوت، لما بغلط بتأسف معنديش مشكلة أني أتاسف للجمهور، لما علمت أدوار فيها المرأة اللي المقهورة والمظلومة الناس كانت بتقولي ليه؟.. الناس حابه أني أخد حقهم، وأديهم قوة، لما بتطلع زيي زيها ضعيفة أبقى كده مبوصلش حاجة.

وأكدت: كونت نفسي وأنا عندي 20 سنة، وأول حاجة عملتها في المجال غنيت وكانت نجمتي المفضلة سيمون، أهلي كانوا ضد فكرة عملي بالوسط الفني، وكنت بطلع في بداياتي كومبارس وأهلي كانوا بيقولو لي يا كومبارس، وقولت لهم هتشوف الكومبارس دي هتبقى إيه في يوم من الأيام، التعليقات السلبية لا تهمني، في البداية كنت أنزعج منها لكن حاليًا لا، اختفيت من على السوشيال ميديا لما حسيت أني مش هقدر أظهر بطبيعتي، حذفت كل حاجة لي على مواقع التواصل الاجتماعي ورجعت تاني بحسابات جديدة، زوجي هيثم هو مرايتي ولما بشتغل معاه في عمل فني برتاح وبحس بالأمان.