خطفت التريند.. ياسمين عبد العزيز تروى معاناتها مع المرض

تصدرت الفنانة ياسمين عبد العزيز تريند تويتر، بعد ظهورها الأول بعد أزمتها الصحية، كضيفة على الإعلامية منى الشاذلي في برنامجها "معكم" عبر قناة CBC، وبدأت الحديث عن حكاية مرضها بقبلة أرسلتها في الهواء باتجاه مقدمة البرنامج.

استقبل الجمهور في الأستوديو ياسمين عبد العزيز استقبالا حارا بالتصفيق والزغاريد والهتاف، قبل أن تجلس وترد التحية لهم، ثم قالت: "إنت داخلة كده علطول، عايزة تسمعي القصة من الأول؟ منى واخداني على السخن."

وروت ياسمين عبد العزيز لأول مرة تفاصيل الأزمة التي عاشتها قائلة: "كنت داخلة أعمل عملية عند دكتور النسا اللي ولدني في بنتي فأنا عندي أكياس من وأنا عندي 16 سنة وهي منتشرة عند بنات كتير عبارة وعملت العملية دي حوالي 5 مرات وكنت بدخل أعمل العملية ومحدش يعرف حاجة عني وأعود لشغلي عادي فأنا تأقلمت على الأكياس والالام بتاعتها بقت صاحبتي وأعيش وأتعايش معها".

وأضافت: "رحت للدكتور قولتله عاوز أعمل العملية بعد مسلسل (اللي مالوش كبير) ومن قتها مشفتش يوم انبساط وجالي مرتين كورونا ففي شهرين أجريت 4 عمليات منهم عمليتين في يوم واحد وبعدها دخلت في أزمتي الصحية.. ورحت عشان أعمل العملية الدكتور قالي هتاخد من ساعتين لتلاتة وهعد يومين تلاتة في المستشفى ودخلت العملية محدش يعرف وكان معايا أحمد العوضي وبنتي وصاحبتي".

وتابعت: "بعد خروجي من العملية شعرت بألم رهيب وكنت بقولهم (أنا بموت) وخرجت من العملية مش فاكرة حاجة بسبب المخدر والمسكنات التي حصلت عليها بسبب الآلام التي أشعر بها انا ست مش بدلع وحمولة لما بكون بتوجع بيكون إحساس حقيقي".

وذكرت: "بعدها بكام يوم قالولي لو معملتش العملية كمان ساعة هتموتي والقولون اتخرم وجالي تسمم في الدم وعملولي العملية والدكتور عصام شلباية أنقذ حياتي قالي انا داخل اعمل العملية والدنيا بايظة خالص وعارف أن الموضوع كان صعب جدا".

وقالت ياسمين عبد العزيز: "بعد ما القولون بتاعي اتخرم وقالولي لو معملتش العملية كمان ساعة هموت كنت حاسة إني مش هطلع من العملية وقولت لاخويا الكبير (خلي بالك من ياسمين وسيف) لاني فعلا حسيت اني داخلة مش طالعة".

وأضافت: "طلعوني من العملية على العناية المركزة وكان راكب خراطيم في انفي وفمي وبطني وكالونات في رقبتي بسبب صعوبة التركيب وجلست في العناية المركزة 5 أيام واللي بيدخولولي كانوا حاسين اني خلاص والدكاترة قالوا ادعولها دي بتعيش اليوم بيومه".

وتابعت: "أنا في العناية المركزة دخلت على جهاز اللي بيدخل عليه 100 حالة بيعيش 10 منهم فقط وقالوا هي اتحطت على جهاز اللي بيدخل فيه مبيطلعش فمنذ بداية العملية لاخرها أنا في غيبوبة".

وذكرت: "وجالي وقت وانا في العناية المركزة شعرت إني خلاص وقولتلهم مش قادرة أكمل بسبب الالام والتعب وقولتلهم شيلوا كل حاجة انا خلاص هبقى مرتاحة اني اروح لربنا".

وكانت ياسمين عبد العزيز أعلنت في بداية شهر سبتمبر تعافيها ووجهت رسالة إلى جمهورها وأصدقائها قالت فيها: "جمهوري الغالي في مصر والوطن العربي وحشتوني جدا الحمد لله انا بقيت كويسه وتعافيت الحمد لله عاوزاكم تتطمنوا رغم كل الصعب اللي مريت بيه في أزمتي الاخيرة، إلا إن سؤالكم ودعمكم هو اللي كان بيهون عليا كل اللحظات المره اللي عدت عليا .. وكفايه اني اقولكم اني حقيقي شفت الموت وكان قريب جدا .. لكن بفضل الله وبفضل دعواتكم الجميله الصافيه وبفضل وقوفكم جنبي بقلبكم وبحبكم وبنيتكم الطيبه ربنا استجاب لدعواتكم وربنا كرمني وعديت المحنه علي خير الحمد لله"، لمعرفة رسالتها كاملة من هذا الرابط

وبدأت أزمة ياسمين عبد العزيز الصحية منتصف يوليو الماضي، عندما أعلن الفنان أحمد العوضي خضوعها لعملية جراحية وطالب جمهورها بالدعاء لها.