خناقة فى الأوبرا.. حفيد كمال الشناوى يهاجم زوجة هانى شاكر

كتب الفنان الشاب عمر الشناوي - حفيد الفنان الكبير الراحل كمال الشناوي - منشورًا له عبر حسابه الرسمي على موقع التواصل الاجتماعي فيس بوك، روى من خلاله موقفا حدث له مع زوجة هاني شاكر، تعاملت فيه الأخير بشكل متعجرف معه، وترك أثرًا سلبيًا سيئًا في نفسه.

وكتب حفيد كمال الشناوي - في منشوره قائلًا: «انا نفسي احكي عن موقف حصلي اثناء ذهابي للاوبرا لاستلام تكريم بالنيابة عن جدي الراحل كمال الشناوي ربنا يرحمه. وكان الحفل ده بيكرم فيه الزعيم عادل امام والفنانة الجميلة لبني عبد العزيز وبيقدم الحفل الفنان هاني شاكر نقيب الموسيقيين، وقتها كان عمري ٢١ سنة ولبست بدلتي الوحيدة ورحت وكنت مرعوب بكوني أول مره يبقي ليا صلة لوحدي بالوسط الفني وناسه بدون وجود جدي معي، فقعدت في المكان المخصص لجدي الله يرحمه ومنتظر التكريم يبدأ».

وتابع حفيد كمال الشناوي: «دخلت زوجه الفنان هاني شاكر مصطحبه معها ابنها وصديق له وكان المكان المخصص لهم بجانبي ولكن المشكله هنا ان كان مخصص لهم كرسيين فقط وهما ثلاثه اشخاص قامت السيده زوجه الفنان هاني شاكر نادهه الفتاه المسئولة عن تنظيم الجلوس في القاعة وقالتلها مين ده وقاعد هنا ليه.

واستكمل حفيد كمال الشناوي: «البنت وشوشتها في اعتقادي ان ده المكان المخصص لكمال الشناوي او ده حفيد كمال الشناوي او حاجه تانيه الله اعلم قامت قايله بصوت عالي يقوم احنا ثلاثه هنقعد جنب بعض هنا. البنت ردت قالتلها ده مكانه ومقدرش أقومه فضلت تردد "يقوم انا مرات هاني شاكر وهو البيحيي الحفله" وبتبصلي بصات اكني حشره قاعده وفضلت واقفه ومش ناويه تتنازل غير لما انا اقوم».

واستطرد حفيد كمال الشناوي: «البنت ردت عليها قالتلها انا عندي حل ان حضرتك تقعدي في الصف ده وابنك وصديقه يقعدوا في مكان تاني في الصف الخلفك مباشرا يعني مش بعيد ردت قالتلها "لا هو يقوم احنا هنقعد هنا". انا كنت محرج جدا لان اولا انا لوحدي ومحدش يعرف انا مين ولان الناس كلها بدات تتفرج عليا اكني قاعد في مكان مش مكاني لأن مفيش انسان هيقوم حد من مكان مخصص له بالجرأه والتعسف ده. في هذه اللحظه سمعت صوت لطيف جدا وكانت الفنانة لبني عبد العزيز قالتلي تعالي يا حبيبي اقعد جنبي الكرسي ده فاضي فقمت بسرعة لأن كنت عاوز الموقف ده ينتهي والناس تنشغل بحاجه تانيه قامت مطبطبة عليا وقالتلي متزعلش».

وأضاف حفيد كمال الشناوي: «الموقف ده اثر في نفسيتي جدا وحسيت اني مليش قيمه. وثانيا حصل في داخلي حاله لخبطة لأن وقتها حسيت بكره تجاه زوجه الفنان هاني شاكر وله هو شخصيا وفنه لأن كان اعتقادي أن الفن وأهله رقي واخلاق والحصل معايا ده كان أبعد ما يكون عن مخيلتي لأهل الفن ولكن يشاء القدر اني في نفس الموقف فنانه جميلة مثل لبني عبد العزيز تعدل الدفة وتوريني إن في كل مكان في دائما الحلو والوحش».

واختتم حفيد كمال الشناوي: «الفن رقي ،الفن اخلاق، الفن ليس بالبس والمظاهر والتفاخر بل بالسيره الطيبة وحب الناس ليك ولفنك. في رأيي الشخصي المتواضع وقف اي فنان لسبب مظهره وان ده لا يتماشي مع المظهر العام فيه تعسف وغموض لأن من يقرر ما هو المظهر اللائق طالما هو غير معارض لقانون الدوله. عاجبني او لا ده مش من حق اي حد لان الازواق تختلف. احتوي الفن ونميه اجتمع بيهم وطور منهم حتي لو بورش من النقابه لتطوير الفن وادعمهم وساعدهم وهنا تبقي فنان بجد وقلبك علي الفن».

وتعرضت زوجة هاني شاكر للنقد في التعليقات على منشور حفيد كمال الشناوي، الذي دفع الأخير لكتابة تعليق إضافي قال فيه: «يا جماعه والله انا اسف بس انا مش بحكي القصه دي عشان حد يذم في اي حد الهدف مش الذم او اننا نغلط في حد بل بالعكس. الهدف من القصة إن التعامل معايا في ظل ظروف دخولي القاعه دي يومها فكرني ان ممكن يكون شبيه باحساس اي حد بيتوقف او بيتمتع وهو مش فاهم ليه بيتعمل معاه كده وان تصرف الفنانه لبني عبد العزيز هداني وريحني وان الافضل هو الاهتواء والتوجيه».