حمو بيكا يهاجم منتقديه بعد التنمر عليه

عبر مغني المهرجانات حمو بيكا، عن استيائه وغضبه من التنمر والسباب عليه بسبب عدم استكمال تعليمه، من بعض الجمهور عبر وسائل التواصل الاجتماعي ووصفه بالجاهل.

وكتب حمو بيكا عبر حسابه بموقع فيس بوك: «بتقولو عني جاهل ومش متعلم.. مع ان دي حاجة انا عمري ما انكرتها ولا حتي خبيتها علي الناس ومن يوم ما ربنا كرمني واتشهرت وبقي ليا جمهور بس هرجع واقولكم تاني إنه دى حاجة مكنتش بايدي».

وأضاف حمو بيكا: «انت بقي يا متعلم التعليم علمك انك تقعد تعاير الناس بعيوبها؟ التعليم علمك ان تفضل تتنمر علي خلق الله ؟ التعليم علمك انك مباح ليك الشتيمه في حد هو اقل منك في شئ؟ اكيد لا فمتجيش من ورا شاشه وكيبورد تعمل فيها عم الناصح وانت اصلًا موركش حاجة تعملها !».

وتابع «انا متعلمتش ومنولتش الشرف الكبير ده بس اتعلمت حاجات كتير في الدنيا انت متعلمتهاش لسه اتعلمت احترم الكبير والصغير.. اتعلمت اشقي واتعب من صغري اتعلمت اني مغلطش في حد.. اتعلمت حاجات كتير جدًا في حياتي انت عمرك مهتتعلمها طول ما انت باصص للناس..!».

وأكمل «فكر في كلامك كويس وكومنتاتك كويس قبل ما تكتبها وقبل ما تقول انك متعلم افتكر انك في "تربيه وتعليم" يعني التربيه قبل التعليم.. صباحكم فل».