”عايزة راجل”.. نرمين الفقي تكشف سر رفضها للزواج

قالت الفنانة نرمين الفقي: "قد ما كانت ماما عاوزة تشوف ولادي لكن في ذات الوقت كان عندها مشكلة بسبب تجربتها مع الانفصال، فاكنت طول الوقت تفصص العريس من باب خوفها عليّ زيادة عن اللزوم، خوف الأم كان زيادة ورغم ذلك كان نفسها تشوفني مرتبطة وعندي حياة لكن في نفس الوقت كانت بتخاف عليّ جدًا".

وعن عنصر المال وأهميته في اختيار الزوج قالت: "الفلوس مهمة في حتة معينة في حياتنا إحنا بنشتغل عشان نصرف على نفسنا ونجيب لبس كويس ونغير عربياتنا.. رغم إني لا أقدم على تغيير سيارتي إلا كل 11 أو 12 عامًا، ولكن الحمد لله غيرتها السنة دي بعد ماربنا كرمني واشتغلت.. أنا عندي صبر".

وتابعت :"أمي دائمًا كانت بتنصحني في اختياري للأعمال وتقول لي بصي على العمل الكويس وماتبصيش للمادة وأنا لو كنت حاطة الفلوس في دماغي كنت زماني إتجوزت مليارديرات".

وأضافت : "كان ممكن أعمل كده بس أنا عاوزة أفضل امرأة زوجة طبيعية صحيح الفلوس مهمة في حياتنا ومش هقول عاوز أتجوز راجل في نفس مستوايا ممكن يكون أقل، لكن يكون عنده مميزات تخليني كامرأة موافقة وكعيلة راضية عليه، لازم يكون نفس المستوى الثقافي والأسري ولا يكون سليط اللسان أو يكون قليل الأدب، يكون حنين وطيب ورجل بمعنى الكلمة لازم يكون راجل".