عمر كمال :بطلت أصلي في الجامع والناس بتعاملني كأني منبوذ وكافر وبتاع رقصات

كشف الفنان عمر كمال كواليس الصورة التي جمعته بدكتور مبروك عطية، وردود الفعل بعد قيامه بنشر الصورة، حيث أوضح أن دكتور مبروك عطية اختاره ضمن ضيوف برنامج يقدمه في شهر رمضان، وقال: "دي حاجة شرفتني جدا، هو بيقدم مساعدات للناس وحاجة كلها خير، وبيجيب ناس تقدم معاه الحاجات دي، ممكن يكون عناصر الناس البسيطة في الشارع بتحبها، ولقيت تعليقات أحزنتني جدا الناس كاتبة إيه ده، كنا بنحب الشيخ مبروك عطية، إيه جاب ده جنبه، بتاع الرقاصات والكباريهات."

وتابع :"أنا عملت أغنية من شهرين إنت معلمة جابت 40 مليون، مع فنانة استعراضية اسمها لورديانا لما الناس إتضايقت كتبت بوست على صفحتي وقلت من هنا ورايح مفيش أي حاجة مبتذلة لي، ومش هجيب رقاصة تاني في أي عمل معايا، مع إن الكليب جاب 40 مليون، وكان حيجيب 100 مليون، استثنيتها من الكليب، وعملت كليب أنا وحمو ونزلته على كلمات وصورة، وماقربتش من السكة دي تاني".

وأضاف: "أنا مش عارف إيه المشكلة معايا لو ربنا كرمني بعربية ليه ركبت عربية ربنا كرمني بدور في مسلسل في رمضان أو مسلسلين، وطالع بشخصيتي مطرب مهرجانات، لأ إزاي تمثل وليه، وبتوع المعهد راحوا فين، دخلت أصلي الجمعة من كام يوم، وبطلت أروح الجامع ده من الناس الناس بتبص لي كأني حاجة غريبة، وجيت أصلي في الصف واحد بيقول للتاني أقف جنبه إنت أحسن لو وقفت جنبه ربنا مش حيقبل مني صلاة، كأني منبوذ أو كافر".