نادية الجندي :قمة النجاح إن الناس صدقتني وأنا غازية.. ورحلة صعودي أصعب من أي فنانة

أكدت الفنانة نادية الجندي، أن الفن رحلة شاقة جدًا، لا يقدر عليها إلا من كان يعشقه بجنون، حيث قالت :"الفن بيستعبد اللي بيحبه، وكل حاجة في الدنيا لها تمن، ولو عاوزة شهرة ونجاح واستمرارية وحب الجماهير فده له ثمن، محدش بيطلع من يوم وليلة، واللي بيطلع بسرعة بينتهي بسرعة".

وتابعت :"رحلة صعودي أصعب من باقي الفنانات، محدش حفر في الصخر زيي، ومحدش مشواره صعب زيي".

وحول تجسيدها لشخصية سيدات بسيطة بالرغم من نشأتها في حي راقي، قالت :"ده قمة النجاح، إن الناس تصدقني وأنا خادمة وغازية، وفي كل الشخصيات اللي ملهاش علاقة بشخصيتي الحقيقية، ومينفعش إني أقدم أدوار تتناسب مع شخصيتي".

وأضافت :"زهقت من نادية الجندي لأنها تعبتني، لكن حب الناس بيخليني أنسى كل التعب، ومش بتعامل مع الفن لمجرد مكاسب مادية أو شهرة، لكن بستمتع وأنا بعمل دور صعب، رغم إن المكسب المادي جميل والشهرة جميلة".