منى زكي تحذر الأمهات في اليوم العالمي للقضاء على الختان: دي جريمة مش عفة

كشفت الفنانة منى زكي، من خلال منشوراً عبر حسابها الشخصي على موقع "الفيس بوك"، أضرار ختان الإناث وتصنيفه كجريمة لها عقوبات في القانون.

وقالت منى زكي: "مفيش أم تقبل على بنتها حاجة تضرها، بس فيه أمهات لحد دلوقتي مش مدركين قد إيه جريمة بشعة زي ختان البنات بتيجي على كرامة وصحة وحياة بناتهم.. ختان البنات مش عفة ولا أي حاجة من الكلام ده، وللأسف فيه أهالي كتير فاكرين إنهم لو عملوا "ختان طبي" لبناتهم يبقى كدة عملوا اللي عليهم".

وأضافت: "انتى اكتر واحدة عارفة مصلحة بنتك، وأكتر واحدة تقدري تحميها من جريمة مايقبلهاش عقل ولا طب ولا دين ولا قانون.. النهاردة اليوم العالمي للقضاء على ختان البنات، وأنا كسفيرة نوايا حسنة ليونيسف حابة أوعي الناس بالقضية دي، خصوصًا إن ناس كتير لسه متعرفش إن فيه جهة حكومية اسمها اللجنة الوطنية للقضاء على ختان الإناث بقيادة المجلس القومى للمرأة والمجلس القومى للطفولة للتوعية بأضرار ختان البنات".

وتابعت: "لو عاوزة تستفسري اكتر أو محتاجة مساعدة علشان تحمي نفسك أو بنتك أو أي بنت تانية من الختان، كلمى خط نجدة الطفل ١٦٠٠٠ أو خط المرأة ١٥١١٥.. وربنا يحمي كل البنات".

وانتهت منى زكي مؤخراً من تصوير مسلسلها الجديد "تقاطع طرق" المقرر عرضه في السباق الرمضاني المقبل، ويشاركها بطولته محمد ممدوح وعائشة بن أحمد ومحمد فراج وسيد رجب ومايان السيد وأحلام الجريتلي، وتأليف وإخراج تامر محسن.