رضا عبد العال في حوار حصري للموجز: البدري ”بتاع مجاملات”.. الشارة حق صلاح.. وهذا سبب الهجوم على رمضان صبحي!
في ظل اقتراب نهائي القرن بين الأهلي والزمالك وقرب موعد مباراة مصر وتوجو وانتهاء الدوري المصري منذ ايام قليلة ، قام الموجز باجراء حوار مع "منجم الكرة المصرية "وصاحب التوقعات الصحيحة أشهرها تنبأه بفشل المنتخب المصري في كأس العالم روسيا 2018 ، وهو نجم الزمالك والأهلي السابق والمدير الفني الحالي لنادي طنطا الكابتن رضا عبدالعال وذلك لاستطلاع رأيه حول ابرز المستجدات الكروية علي الساحة الرياضية المصرية.
وجاء حوار "الموجز "مع المدير الفني لنادي طنطا ونجم القطبين السابق،الكابتن رضا عبدالعال كالتالي:
في البداية.. ايه تقييمك في تجربتك مع نادي طنطا في الدوري الممتاز ؟
انا سعيد بتجربتي مع طنطا ومقدرش اقول رأيي والي يقول رأيه ويقيم اداء الفريق وتطوره هي الجماهير.
ايه رأيك في عروض لاعبي طنطا ومغادرتهم بعد انتهاء الدوري.. هل الفضل يرجع لرضا عبد العال؟
والله مقدرش اقول انا،والحمد لله اداء الجماهير شافت اداء اللاعبين اتغير معايا ازاي، وهي الي تقدر تحكم.
ايه رأيك في اللجنة الخماسية.. وهل انت مع قرار هبوط طنطا ؟
انا ضد هبوط النادي ودا ميرضيش ربنا، لان فترة ما بعد كورونا الاندية الصغيرة اكثر الفرق تضررا، واللجنة الخماسية كسرت قرارت الفيفا واللوائح، واتحاد الكرة لغي الهبوط في الدرجة الثانية، مش عارف ليه العناد ده واصرارهم علي هبوطنا وعدم الغاء الهبوط مماثلة بالدرجة الثانية.
مين هيكسب في نهائي القرن.. الأهلي اما الزمالك؟
انا شايف ان الماتش 50:50، والمباراة ليس لها اي مقياس ومحدش يقدر يتوقع النتيجة.
موسيماني أفضل ولا باتشيكو؟
مقدرش اقول مين الأفضل ، والنهائي هو الي هيحكم واللي هيكسب في الماتش هو هيبقي أفضل.
هل انت مع احتراف مصطفي محمد ؟
انا مع احتراف مصطفي محمد بعد انتهاء البطولة الأفريقية، لو جاله عرض كويس ليه لا.
أفضل لاعب في الدوري ؟
اشرف بن شرقي
أفضل حارس مرمى في مصر ؟
الشناوي وبعده محمد أبو جبل
أفضل فريق في الدوري ؟
من وجهة نظري فريق اسوان بعد كورونا
أفضل مدرب في الدوري ؟
فايلر
توقعك لمباراة مصر وتوجو؟
مش متفائل بمباراتي مصر أمام توجو مع حسام البدري ، وهيجامل في التشكيل.
ايه رأيك في ظهور رمضان صبحي الأخير علي الشاشات وانضماضه للمنتخب المصري؟
انا مع حسام البدري في انضمامه، ومش عارف رمضان بيتهاجم ليه، دا كله عشان ساب النادي الأهلي وهو معملش اي حاجة، دا احتراف والنادي الأهلي ساب ناس كثير زي حسام عاشور، والكل بيتكلم علي وجود رمضان في المنتخب عشان يرضوا جماهير الأحمر ، طب هو ليه محدش اتكلم عن انضمام طاهر محمد طاهر الي كان بينزل بديل مع المقاولون واتصاب اهو في أول تدريب ولا عشان رايح النادي الأهلي.
انت مع منح صلاح شارة الكابتن ولا مع الأقدمية؟
انا مع منح صلاح شارة الكابتن، ولا اعترف بنظام الاقدمية في الوقت الحالي، ازاي يبقي عندي لاعب زي صلاح ومياخدش الشارة، والكلام دا بيحصل برة في اي حتة زي رونالدو وميسي.
