كاملة أبو ذكري :”اتنين من نجوم بـ100 وش أصابهم الغرور”

قامت المخرجة كاملة أبو ذكري بالتعليق على الجدل المثار مؤخرا بسبب تصريحاتها حول غرور بعض الأبطال المبتدئين في مسلسل "بـ 100 وش"، وأوضحت كاملة أنها قالت إن لديهم موهبة، لكن الغرور ينهي أي موهبة مهما كان حجمها، مضيفة: "الواحد لما يثق أوي في نفسه بيأخذ خطوات خاطئة، ولم أقصد المجموعة كلها، وكنت أحذرهم من حبي لهم، والأستاذ يوسف شاهين قال لنا وأنا كنت طالبة في المعهد (يوم ما تشوف شغلك وتقول الله إيه الحلاوة ديه أعرف إنك في طريقك للفشل)".

وأضافت أنها تقصد شخصين من المجموعة التي في المسلسل، لكنها لن تصرح بهم، قائلة: "مش هقدر أقول عليهم، ولكن كان فيه حاجة صعبة وعايزاهم يستمروا ويكبروا وحتى لو الواحد بقى أهم نجم في مصر مش المفروض يكون فيه غرور، فيه اثنين ممثلين الغرور وصل لهم بشكل كبير والصراحة قلقت عليهم، لأنه شايفة إن فالناس مش هتشتغل معهم وهيضيعوا موهبتهم، والواحد طوال الوقت بينتقد نفسه ويدور ولا يستريح، واللي حاطط في بطنه بطيخة صيفي وفاكر إنه حاجة كبيرة كلنا في النهاية نجتهد ونقدم فن وربنا منحنا قبول وحب الناس ولا يمكن أن نتعالى على الأخرين".

وتابعت المخرجة أنها لم تصادف أي نجم كبير يتعامل بغرور مع من حوله، مضيفة: "لما أشعر إن اللي قدامي متعالي عليّ أو على الطاقم اللي بيشتغل معي بوقفه عند حده، وتعاملت مع نجوم كبار جدا وبالعكس كانوا يتعاملون معي كأصدقاء".

واختتمت: "أنا أحب أوضح إن بعد البوست اللي كتبته قفلت صفحة الفيس بوك وشيلته لأنيمكنتش عارفه إنه هيعمل الدوشة الكبيرة دي، وكانت زميلة لي حكيت لي عن شخص كيف يتعامل مع الناس حاليا في التصوير واتخضيت وما يضايقني إن الباقي أخذ الكلام عليه ولكن الحقيقة ما قصدته هما شخصين، وهما موهوبين ومش عايزاهم يمشوا في الطريق ده.. وأنا معرفش اشتغل مع حد مغرور".