آسر ياسين :الفن ساعد في انتشار التحرش..والبطل المتحرش محبوب ومشهور

وجه الفنان آسر ياسين، عبر حسابه الرسمي بموقع إنستجرام، رسالة إلى أصدقائه من الفنانين، بأنهم يتحملون مسؤولية مواجهة التحرش.

وقال: "موضوع التحرش ده قديم مش جديد، مش هقعد أقول كلام له علاقة بأن الأهالي تاخد بالها من بناتها، وإن البنات تشتكي لو حد قالها حاجة لأن ده بديهي".

وأضاف : "فيه مسؤولية فنية على أصدقائي من الفنانين مخرجين ومنتجين وممثلين، يعني من فترة مش كبيرة كانت فيه أعمال بتتعامل مع موضوع التحرش إنه عادي، وعادي إن البطل يلمس الست وإن الست الأجنبية مستباحة لأنها أجنبية، وفي الآخر البطل بيتحب وينتصر".

وتابع: "ده طبعا بيبقى المثال بتاع الشباب، طب مالبطل بيتحب ليه ماعملش كدة أنا كمان، وعشان كدة بناشد كل المخرجين والمنتجين والممثلين والكتاب إنهم لازم يراعوا الموضوع ده لأن إحنا واجهة الشباب".

يذكر أن عدد من الفنانات كشفن عن تعرضهن للتحرش، من بينهن سلمى أبو ضيف، رانيا يوسف، سارة عبدالرحمن، هنا الزاهد، مايان السيد، وأخريات.