إصابة الفنانة المصرية إيناس عز الدين بفيروس "كورونا"

كشفت الفنانة إيناس عز الدين عن إصابتها بفيروس كورونا، وذلك أثناء تواجدها في المغرب عن طريق شخص مصاب، وذلك عبر صفحتها الرسمية بموقع التواصل الاجتماعي فيس بوك.
وكتبت إيناس: "الحمد لله حتى الان انا حالتي مستقرة الى حد ما و في حجر منزلي لوحدي ومش بختلط بأي شخص وبلتزم بالاجراءات الوقائية المُتبعة و كل ده طبعاً بالمتابعة مع وزارة الصحة الا اذا الحالة سائت ساعتها بيحصل عزل طبي في احدى مستشفيات الحجر الصحي وده الاجراء المتبع من قبل وزارة الصحة معايا ومع ناس كتير وده بروتوكول مُتبع في العالم كله مش في مصر بس ان الحالات السيئة بس هي اللي بتدخل عزل صحي في مستشفيات ومافيش حاجة اسمها لو مريضة انزل اي مستشفى عادية جنب بيتي".

وتابعت: "نزولي المستشفى وانا مصابة معناها اني هعدي كل شخص في طريقي ومافيش مستشفى مجهزة انها تستقبل حالات الا المستشفيات المخصصة من قبل وزارة الصحة ودي الوزارة اللي بتحول عليها الحالات اللي محتاجة انها تتعزل في مستشفى والفايرس ليه درجات فيه درجات بتتابع من البيت مع وزارة الصحة وبيتعملها حجر صحي منزلي وفيه حالات بتتدهور فبيدخلوها العزل الصحي بالمستشفيات".

وأضافت: " ده نظام متبع في العالم كله وانا حالتي تستدعي الحجر المنزلي حتى الان الحمد لله.. الاعراض معايا كحة جافة جداً نشفان ريق الم شديد في الحلق مع صعوبة في البلع والم بحرقان شديد في منطقة الصدر كأن طوبة على الصدر وهن و ضعف شديد والم في الجسم مع صداع و دوخة بسبب عدم وصول الاوكسجين بشكل كافي بسبب صعوبة التنفس مافيش حرارة حرارتي مش بتاخطى 37 ونص و ده لان الجسم لسه ما وصلش للمرحلة اللي يتهاجم بشدة من الفايرس فتبدأ الحرارة ترتفع علشان تهاجم الفايرس".

وأشارت الى أن : "مافيش اي داعي للزُعر ولا نشر الهلع بين الناس ابداااااااااً ولا فيديوهات صريخ و صويت ولطم كل ده بيخوف و يرعب الناس وبيخلي فيه طاقة سلبية تخلي ناس كتير من الخوف تتوهم المرض و تخلي المناعة تضعف لان العامل النفسي بيرفع المناعة".

وتابعت: "وزي ما قولت في الفيديو توخوا الحذر واعملوا اللي عليكم ولكن دون فزع او نشر هلع بين الناس لان الناس فعلاً مش متحملة انشروا طاقة ايجابية وكلموا الناس عن كام حالة اتحولز من ايجابي لسلبي وكان حالة خفت وخرجت من المستشفى وكام حالة عملت حجر منزلي وحالتها كانت بسيطة و اتحسنت وهي في بيتها".

وأضافت: "انشروا الطاقة الايجابية ارجووكم الناس محتاجينها.. مافيش نهائي اعراض زي العطس او الرشح معايا، مافيش حاجة حتى الان اسمها علاج كورونا الاجراءات المتبعة معايا في حالة الالم او التهاب الحلق او الصداع اخذ باراسيتامول او بنادول او ادول 500 وتقوية المناعة بفيتامين دي و فيتامين سي و اكل الخضار وفواكه تحتوي على فيتامين سي زي البرتقال والكيوي والليمون والموز و شرب سوايل دافية والابتعاد عن المشروبات الباردة و وقف السكريات نهائياً".
وأكدت : "الفايرس انتقل ليا وانا راجعة من المغرب من اسبوعين في الطيارة عن طريق شخص كان مصاب و ما قالش و هو كان عارف وتم اكتشاف اصابته لما وصل مصر".


التعليقات